هێرشە چاوەڕوانکراوەکەی ئیسرائیل کاردانەوەی جیاوازی لە شەقامی ئێران لێدەکەوێتەوە

 

 

 

لەیلا دەڵێت بە دڵنیاییەوە نیگەرانین، چونکە رۆح شیرینە. ئیلهام-یش دەڵێت بشمرین هەر شەهیدین.

 

هەفتەیەک زیاترە، ئیسرائیل دەهۆڵ و زڕنا بۆ هێرشە چاوەڕێکراوەکەی بۆ سەر ئێران لێدەدات و باس لە "گورزێكی کوشندە" دەکات.

 

یۆئاڤ گالانت، وەزیری بەرگریی ئیسرائیل رۆژی 9-10-2024 رایگەیاند: "هێرشەکەمان کوشندە، ورد و شۆکێنەر دەبێت، کاتێك کە دەیکەین ئەوان تێناگەن چی روویدا و چۆن روویدا، ئەنجامەکان دەبینن".

 

بەرپرسانی ئێرانی، دیارترینیان عەباس عەراقچی، وەزیری دەرەوە بەم دواییە هۆشداری دایە ئیسرائیل و پێیگوت: "ئەگەر هێرش بکەیت، تونودتر لە جاران وەڵام دەدرێیتەوە."

 

شەڕە مووشەک و قسەی تەلئەڤیڤ و تاران، شەقامیشی هێناوەتە قسە. ئیرەج- دانیشتووی تارانە و دەڵێت: "ناڵێم نیگەران نین، بەڵێ ئێمە نیگەرانی وڵاتمانین و حەز ناکەین ئێران تووشی شەڕ ببێت و شەڕ بێتە نێو خەڵک و وڵاتمان".

 

حەمید دانیشتووی تارانە و ئاماژە بەوە دەکات: "نەخێر پێموانییە هەردوو وڵات بیانەوێت تێکەڵ بە شەڕ بن، چونکە دەرهاویشتەی ئابووری و سەربازی قورس بۆ هەردوولا لێدەکەوێتەوە".

 

کەی، کوێ و چۆن، ئەو سێ پرسیارەن کە هێشتا بەرۆکی هێرشەکەی ئیسرائیلیان بەرنەداوە. 

 

دەگوترێت کەلێنێک لە نێوان بایدن و نەتانیاهوو هەیە؛ یەکەمیان پێی باشە هێرشێك بێت ئەتۆم و نەوتی ئێران نەگرێتەوە؛ دووەمیشیان مێشکی دەکوڵێت بۆ تێسرەواندنی ئەو ئامانجانە.