ئێران: پرۆسەی ئازادکردنی پارە سڕکراوەکانمان لە عێراق و کۆریای باشوور دەستیپێکرد

 

وەزارەتی دەرەوەی ئێران لە راگەیێندراوێکدا کە شەوی پێنجشەممە بڵاوی کردەوە، رایگەیاند: "پرۆسەی ئازادکردنی ملیارەها دۆلار لە سەروەت و سامانی کۆماری ئیسلامیی ئێران کە چەند ساڵێکە بەشێوەیەکی نایاسایی لە کۆریای باشوور لەلایەن ئەمریکاوە دەستی بەسەردا گیراوە، دەستیپێکرد. ئێران گەرەنتی پێویستی بۆ پابەندبوونی ئەمریکا بە ئەرکەکانی لەم بوارەدا وەرگرتووە."

 

لە بەیاننامەکەدا هاتووە: "لابردنی کۆت و بەندەکانی سەر سەرچاوە داراییەکانیمان کە بە نایاسایی و بەهۆی نیگەرانیی بانکە دەرەکییەکان لە گەمارۆ چەپەڵەکانی ئەمریکا بەشێوەیەکی نایاسایی سڕ کراون یان بەکارهێنانیان قورس کراوە، هەمیشە لە بەرنامەی وەزارەتماندا بووە."

 

سەبارەت بە چۆنییەتی وەرگرتنەوە یان خەرجکردنی پارەکە، وەزارەتی دەرەوەی ئێران دەڵێت: "شێوازی کەڵکوەرگرتن لەو سەرچاوە داراییانە لە بەردەستی کۆماری ئیسلامی ئێراندایە، ئەو پارەیە بەپێی بریاری لایەنە پەیوەندیدارەکان بۆ پێداویستییە جۆراوجۆرەکانی وڵات خەرج دەکرێت."

 

لەگەڵ ئازادکردنی پارە سڕکراوەکان، باس لە ئاڵوگۆڕکردنی چەند گیراوێکی نێوان هەردوو لا دەکرێت.

 

وەزارەتی دەرەوەی ئێران دەڵێت: "لە چوارچێوەی رێکەوتنەکەدا ژمارەیەک هاووڵاتی ئێرانی کە لە ئەمریکا زیندانی کراون لە ماوەیەکی نزیکدا ئازاد دەکرێن، هەروەها ژمارەیەک زیندانی ئەمریکیش لەلایەن ئێرانەوە ئازاد دەکرێن.

 

لە لایەکی دیکەوە، بە پێی ئاژانسی هەواڵی فارس نیوزی سەر بە سوپای پاسدارانەوە، محەمەد جەمشیدی، جێگری کاروباری سیاسی نووسینگەی سەرۆککۆماری ئێران رایگەیاندووە، دوای ئازادکردنی پارەی ئێران لە عێراق، پرۆسەی ئازادکردنی سەرجەم سەروەت و سامانی ئێران لە کۆریای باشووریش دەستیپێکردووە و تاوەکو گواستنەوەی تەواوی پارەکە، گیراوە ئەمریکییەکان لە ئێران دەمێننەوە.

 

بەپێی زانیارییەکان، لە چوارچێوەی رێککەوتنەکەدا 6 ملیار دۆلاری سڕکراوی ئێران لە کۆریای باشوور ئازاد دەکرێت و دەگوازرێتەوە بۆ بانکێک لە قەتەر، هەروەها نزیکەی 6.6 ملیار دۆلار لە پارەی سڕکراوی ئێران لە بانکی بازرگانی عێراقەوە دەگوازرێتەوە بۆ بانکەکانی عومان.

 

وەزیری دەرەوەی ئێران، حوسێن ئەمیر عەبدوڵڵاهییان رۆژی 8ی ئەم مانگە رایگەیاندبوو، ئێمە چەندین مانگە لە رێگەی قەتەر و عومانەوە سەرقاڵی نامە گۆڕینەوەین لەگەڵ ئەمریکا، پرسی ئاڵۆگۆڕکردنی زیندانییان بۆ ئێمە بە تەواوەتی مرۆییە.

 

ئێران مافی نییە بەشێوەی کاش ئەو پارانە وەرگرێت، بەڵام دەتوانێت بۆ کڕینی دەرمان و ئەو کەرەستانە بەکاربهێنێت، کە سزاکانی ئەمریکا نایانگرێتەوە.