رووداو دیجیتاڵ
بەڕێوەبەرێکی کۆمپانیای نیشتمانیی گازی ئێران رەتیکردەوە، هەناردەکردنی گازی وڵاتەکەی بۆ عێراق پچڕابێت و رایگەیاند، بەهۆی کێشەی تەکنیکییەوە هەناردەکردنی گاز لە ئێرانەوە بۆ عێراق رۆژانە بەبڕی 5 ملیۆن مەتر سێجا تاوەکو 10 ملیۆن مەتر سێجا کەمبووەتەوە.
محەمەد رەزا جەولایی، بەڕێوەبەری هەناردەکردن لە کۆمپانیای نیشتمانیی گازی ئێران رایگەیاند، بەهۆی بەرزبوونەوەی پلەکانی گەرما لە باشوور و باشووری رۆژئاوای ئێران، کەرەستەکانی بەرهەمهێنان و گواستنەوەی گاز بە باشی کارناکەن، ئەوەش تۆڕی گواستنەوەی گازی لە رۆژئاوای ئێران رووبەڕووی کێشە کردووەتەوە، کە بووەتە هۆی ئەوەی هەناردەکردنی گاز بۆ عێراق کەمببێتەوە.
جەولایی رایگەیاند، مانگی رابردوو رۆژانە 30 ملیۆن مەتر سێجا گاز هەناردەی عێراق کراوە، بەڵام ئەم مانگە بۆ 21 ملیۆن مەتر سێجا کەمبووەتەوە.
کەمبوونەوەی هەناردەکردنی گازی ئێران بۆ عێراق، بووەتە هۆکار بۆ کەمبوونەوەی کاژێرەکانی پێدانی کارەبا لە عێراق و نزیکەی 5 هەزار مێگاوات کارەبا لە عێراق کەمبووەتەوە.
پڕۆژەی هەناردەکردنی گازی ئێران بۆ عێراق 6 ساڵ لەمەوبەر دەستیپێکرد و ئەو بۆڕییەش کە گازی ئێران دەگوازێتەوە عێراق، درێژکراوەی بۆڕی شەشەمی گازی ناوخۆی ئێرانە کە درێژییەکەی 590 کیلۆمەترە.
گازی کێڵگەی پارسی باشووری ئێران لەرێگەی ئەو بۆڕییەوە دێتە پارێزگاکانی رۆژهەڵاتی کوردستان، کرماشان و ئیلام لەوێشەوە هەناردەی عێراق دەکرێت.
ئەو پڕۆژەیە جگە لە بۆڕییەکە، خاوەنی 5 وێستگەی زیادکردنی گوشار و 5 وێستگەی کۆنترۆڵکردنی گوشار و وێستگەیەکی ئەندازەییشە.
بۆڕی شەشەمی ناوخۆیی ئێران جگە لە هەناردەکردنی گاز بۆ عێراق، هەروەها پێداویستی پارێزگاکانی رۆژهەڵاتی کوردستانیش بە گازی سرووشتی دابین دەکات، لەبەرئەوەش لەکاتی زیادبوونی بەکارهێنانی ناوخۆ لە ئێران، بەشی هەناردەکردنی گاز بۆ عێراق کەمدەبێتەوە.
ئەو "کێشە تەکنیکی"ـیەی ئێران باسی دەکات، گرفتی بۆ کارەبای عێراق دروستکردووە
زیاد عەلی فازڵ، وەزیری کارەبای عێراق، رۆژی دووشەممە (10-07-2023) بە میدیای فەرمیی عێراقی راگەیاند "وەزارەتی کارەبا بەرهەمهێنانی کارەبای گەیاندووەتەوە بەرزترین ئاست کە 26 هەزار مێگاواتە، بەڵام بەهۆی بڕینی زیاتر لە نیوەی گازی ئێرانی لە وێستگەکانی کارەبا، 5 هەزار مێگاوات کارەبا کەمبووەتەوە، ئەمەش بەهۆی دواکەوتنی دانەوەی شایستەکانی ئێران دەگەڕێتەوە".
وەزیری کارەبای عێراق دەڵێت، "ئێستا نزیکەی 20 هەزار و 600 مێگاوات کارەبا بەرهەمدەهێنین، تەنیا بە گەڕانەوەی گاز لە ئێرانەوە، کاژێرەکانی پێدانی کارەبا وەک پێشوویان لێ دێتەوە".
زیاد عەلی فازڵ جەختی لەوە کردەوە، لەگەڵ لایەنی ئێرانی گفتوگۆی چڕ دەکەن و، دەڵێت "هیوادارین لە دۆخی عێراق تێبگەن، کە سیستەمی کارەبا چۆنە و پلەی گەرما بەرزبووەتەوە و، جارێکی دیکە گاز هەناردە بکەنەوە".
وەزیری کارەبا دڵنیایی دا، دۆخەکە وەک خۆی لێ دێتەوە، چونکە وەزارەتی کارەبا تەواوی قەرزەکانی ئێرانی داوەتەوە، بەڵام بابەتەکە پەیوەستە بە بانکی بازرگانیی عێراقی (TBI)، کە سزاکانی ئەمریکا رێگرن و ناتوانێت پارەکە بداتەوە ئێران، ئەمەش کێشەیەکە، کە وەزارەتی کارەبا و هاووڵاتییان باجەکەی دەدەن".
عێراق پێویستی بە نزیکەی 34-35 هەزار مێگاوات کارەبایە و پێش ئەم هەنگاوەی ئێران، نزیکەی 25 هەزاری هەبوو.
لە بەغدا، هەشت کاژێر بۆ 12 کاژێر کارەبای نیشتمانی هەیە و کورتهێنانەکە لە رێگەی 13 هەزار موەلیدەوە پڕدەکرێتەوە کە دوو جۆرن؛ یەکێکیان 24 کاژێرییە و هەندێکجار نرخی ئەمپێرێکی دەگاتە 25 دینار و ئەوەی دیکەیان تاوەکو 12:00ـی شەو کاردەکات و، نرخی ئەمپێرێکی دەگاتە 10 دینار.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ