سەرەڕای پەسندکردنی بڕیاری ئاگربەست هێرشەکانی ئیسرائیل بۆسەر غەززە بەردەوامن

 

 

ئەنتۆنی بلینکن، وەزیری دەرەوەی ئەمریکا رایگەیاند، "کاتێک سەرۆکوەزیران نەتەنیاهووم لە ئیسرائیل بینی، پاڵپشتی و پابەندبوونی خۆی دووپاتکردەوە بۆ گەیاندنی ئەو رێگەچارەیە بۆ هێڵی کۆتایی."

 

هەرچەندە هەردوو لایەنی سەرەکیی جەنگەکە پێشوازییان لە بڕیارەکەی ئەنجوومەنی ئاسایش کردووە، بەڵام نە ئیسرائیل و نە حەماس بە فەرمی رازیبوونی خۆیان نەگەیاندووەتە لایەنەکانی دانوستاندنکاری تایبەت بە ئاگربەستی غەززە.

 

لە کەرتی غەززەش کە زیاتر لە هەشت مانگە تەنیا هەفتەیەک ئارامیی بەخۆوە بینیوە، لە ماڵ و باڵەخانە وێرانبووەکانیانەوە چاوەڕێی جێبەجێکردنی بڕیارەکە دەکەن.

 

جەلال سەوافیری، ئاوارەی غەززە دەڵێت، "هیوادارین بڕیارەکە لەلایەن هەموو لایەکەوە جێبەجێ بکرێت. چەندین جار هەوڵی ئاگربەست دراوە، بەڵام هیچ ئەنجامی نەبووە و هیوادارین ئەمجارە جێبەجێ بکرێت و هیچ لایەک دژایەتیی نەکات."

 

پێشنیازەکە کە لەلایەن سەرۆکی ئەمریکاوە پێشکێش کراوە و لە ئەنجوومەنی ئاسایش دەنگی پێداوە، سێ قۆناخە: قۆناخی یەکەم، ئاگربەستێکی شەش هەفتەییە و تێیدا ژمارەیەک بارمتە و زیندانی ئازاد دەکرێن، هێزەکانی ئیسرائیل لەنێو خەڵک دەکشێنەوە، رۆژانەش 600 بارهەڵگری هاوکاریی مرۆیی دەگەیێندرێتە غەززە. قۆناخی دووەم، جەخت لە کشانەوەی تەواوی هێزەکانی ئیسرائیل و ئازادکردنی سەرجەم بارمتەکان دەکاتەوە و لە هەموو شوێنێکیش شەڕ دەوەستێت. قۆناخی سێیەم، نۆژەنکردنەوەی غەززە و کۆکردنەوەی هاوکاری بۆ ئەو مەبەستەیە.