سەرۆکی لقی یەمەنی رێکخراوی قاعیدە گیانی لەدەستدا

 

 

لقی یەمەنی رێکخراوی قاعیدە ڤیدیۆیەکی بڵاوکردەوە، تێیدا خالید باترفی، سەرۆکی لقی یەمەنی رێکخراوی قاعیدە بە مردوویی دەبیندرێت و تەرمەکە بە ئاڵای رێکخراوەکە داپۆشراوە.

 

باترفی لە چلەکانی تەمەنیدا بوو و حکومەتی ئەمریکا 5 ملیۆن دۆلاری تەرخان کردبوو بۆ هەر کەسێک کە زانیاری لەبارەیەوە پێ بدات، کە ئەو زانیارییە ببێتە هۆی کوژران یان دەستگیرکردنی، ئەوەش بەهۆی سەرپەرشتیکردنی کارەکانی رێکخراوەکە لە نیمچە دوورگەی عەرەبی.

 

قاعیدە لەو ڤیدیۆیەدا ئاماژەی بەوە کردووە، سەعد عەتف ئەولاکی دەبێتە کەسی یەکەمی رێکخراوەکە لە نیمچە دوورگەی عەرەبی.

 

ویلایەتە یەکگرتووەکانی ئەمریکا 6 ملیۆن دۆلار دەداتە هەر کەس و گرووپێک کە زانیاریی لەبارەی سەعد عەتفەوە پێ بدات، بە جۆرێک ئەو زانیارییە رێگە خۆش بکات بۆ کوژرانی یان دەستگیرکردنی. ئەمریکا دەڵێت، ئەو بەرپرسەی رێکخراوی قاعیدە "بە ئاشکرا داوای هێرشکردنە سەر ویلایەتە یەکگرتووەکانی ئەمریکا و هاوپەیمانەکانی کردووە."

 

خالید باترفی لە شاری ریازی پایتەختی سعودیە لەدایکبووە و لە ساڵی 1999 چووەتە ئەفغانستان.