بەشار ئەسەد بە فەرمی بۆ لووتکەی داهاتووی کۆمکاری عەرەبی بانگهێشتکرا

رۆژی چوارشەممە، 10ـی ئایاری 2023، سەرۆکایەتیی سووریا راگەیێندراوێکی بڵاوکردەوە و دەڵێت، "ئەسەد بانگهێشتنامەیەکی لە شا سەلمانی پاشای سعودیە بۆ بەشداری لە لووتکەی کۆمکاری عەرەبی پێگەیشتووە، کە بڕیارە لە 19-5-2023، لە شاری جەددە لە سعودیە بەڕێوەبچێت."

 

ئەو بانگهێشنامەی بەشار ئەسەد بۆ لووتکەی کۆمکاری عەرەبی لە کاتێکدایە، کە کۆمکارەکە رۆژی یەکشەممە، 7-5-2023، بڕیاری دا سووریا وەکو ئەندام وەربگرێتەوە، ئەوەش وەکو سەرکەوتنێک بۆ ئەسەد لە جەنگی نێوخۆی وڵاتەکە لێکدرایەوە، کە بووەتە هۆی کوژرانی زیاتر لە 350 هەزار کەس و دەربەدەربوونی نیوەی دانیشتووانی وڵاتەکە.

 

ئەمریکا چەندین جار هۆشداریداوە کە نابێت پێش لێپرسینەوە لە تاوانەکانی جەنگ و تاوانەکانی دژی مرۆڤایەتی، پەیوەندییەکان لەگەڵ حکومەتی دیمەشق ئاسایی بکرێنەوە.

 

ڤیدانت پاتێل، جێگری گوتەبێژی وەزارەتی دەرەوەی ئەمریکا رۆژی دووشەممە، 8-5-2023، بە رۆژنامەڤانانی گوت: "پێمانوانییە لەم کاتەدا سووریا شایستەی گەڕانەوەی نێو کۆمکاری عەرەبی بێت."

 

لەدوای گەڕانەوەی سووریا بۆ کۆمکاری عەرەبی، وەزارەتی دەرەوەی ئەو وڵاتە رایگەیاند: "گفتوگۆ و پێکەوەکارکردنی سووریا لەگەڵ وڵاتانی عەرەب بۆ رووبەڕووبوونەوەی ئاڵنگارییەکانی قۆناخی داهاتوو پێویست و گرینگە."

 

لە ساڵی 2011ـەوە، لەدوای هەڵگیرسانی شەڕی نێوخۆی سووریا و لەسەر بنەمای "رەفتاری تووند"ی هێزە ئەمنییەکان دژ بە خۆپێشاندەران، کۆمکاری عەرەبی بڕياری هەڵپەساردنی ئەندامێتی سووریای دا.