سەرکردەی حووسییەکان: تائێستا 177 کەشتیمان کردوونەتە ئامانج

 

 

عەبدولمەلیک بەدرەدین حووسی، سەرۆکی پارتی ئەنساروڵڵای حووسییەکان، لە گوتارێکدا رایگەیاند ئیسرائیل دەیەوێت رووبەری جەنگەکەی فراوان بکات و بەشێک لە وڵاتانی عەرەبی بە هاوبەش لە پارێزگاریکردن لێی دەزانێت.

 

سەرۆکی حووسییەکان گوتی: "هەندێک وڵات ئاسمانی وڵاتەکانیان بۆ ئیسرائیل دەکەنەوە و پشتیوانیی ئابووری و میدیایی و سیاسیی پێشکێش دەکەن." دەشڵێت، هێرشەکانی حیزبوڵلا و حوسییەکان کاریگەریی لەسەر ئیسرائیل دروستکردووە. 

 

عەبدولمەلیک بەدرەدین حووسی باسی لە پشتیوانی گرووپە چەکدارەکانی عێراق کرد: "بڕیاری بەردەوامیی بە هێرشەکان لەلایەن بەرەی پشتیوانیی عێراقەوە بەردەوامە."

 

حووسییەکان بەردەوامن لە بە ئامانجکردنی ئەو کەشتیانەیە بە دەریای سووردا دەڕۆن و سەرکردەکەیان دەڵێت: "بۆ پشتیوانی غەززە تاوەکو ئێستا 177 کەشتییمان کردووەتە ئامانج، تەنیا لەم هەفتەیە بە 16 مووشەک و درۆنێک ژمارەیەک هێرشمانکردووە و بووەتە هۆی کردنە ئامانجی دوو کەشتیی شەڕکەری ئەمریکی و خستنەخوارەوەی فڕۆکەیەکی ئەمریکی لە جۆری MQ-9." 

 

ئەو پێیوایە بە ئامانجکردنی کەشتییەکان کاریگەری هەبووە، عەبدولمەلیک بەدرەدین حووسی دەڵێت: "کردنە ئامانجی کەشتییەکانی پەیوەست بە ئەمریکا و بەریتانیا کە شمەک و کەلوپەل بۆ ئیسرائیل دەگوێزنەوە، وایکردووە هاتووچۆی دەریاوانی کەمببێتەوە، ئەوەش سەرکەوتنە بۆ هێزە چەکدارەکان و بەرەی پشتیوانیی یەمەن."

 

ئەو سەرکردەیەی حووسییەکان پێنج وڵات کە یەکێکیان ئەمریکا و چواریان وڵاتی عەرەبین بە پاراستنی ئیسرائیل تۆمەتبار دەکات و دەڵێت:"پێویستمان بە گەشەپێدانی توانا و تەکنەلۆژیامانە بۆ تێپەڕاندنی ئەو پێنج وڵاتە کە ناتوانن دڵنیایی بۆ ئیسرائیل دابین بکەن."

 

لەدوای رووداوەکانی 7ـی ئۆکتۆبەری ساڵی رابردوو، حووسییەکان هێرش دەکەنە سەر سعودیە و ئیسرائیل لە دەریای سوور و دەریای عەرەب، بەمەش هاتووچۆی کەشتییەکان لەو ناوچانە 90٪ کەمیکردووە.