رووداو دیجیتاڵ
وەزیری دەرەوەی ئێران بە وەکالەت ئیسرائیل بەوە تۆمەتبار دەکات کە دەیەوێت لە ناوچەکە جەنگ بەرپابێت. دەشڵێت، ئیسرائیل ناتوانێت رووبەڕووی ئێران ببێتەوە.
رۆژی پێنجشەممە، 08-08-2024، عەلی باقری، وەزیری دەرەوەی ئێران بە وەکالەت، رایگەیاند، ئیسرائیل بە کوشتنی ئیسماعیل هەنییە و فوئاد شوکر "هەڵەیەکی ستراتیژی" کرد.
ئیسرائیل تاوەکو ئێستا کوشتنی ئیسماعیل هەنییە، سەرۆکی پێشووی مەکتەبی سیاسیی حەماسی لە ئەستۆ نەگرتووە؛ بەڵام ئێران ئیسرائیلی تۆمەتبار کردووە و بەڵێنی تۆڵەکردنەوەی داوە.
باقری گوتی، ئیسرائیل دەیەوێت تەنگژەکان، جەنگ و پێکدادانەکان زیاد بن و وڵاتانی دیکەش بگرنەوە، "بەڵام ئەوان ئەو هێز و دەسەڵاتەیان نییە رووبەڕووی ئێران ببنەوە."
رۆژێک پێش ئەو قسانە، بنیامین نەتەنیاهوو، سەرۆکوەزیرانی ئیسرائیل لە بنکەیەکی سەربازیی وڵاتەکەی گوتی: "ئێمە بۆ هێرشبردن و بەرگریکردن ئامادەین."
رۆژی 30-07-2024 ئیسرائیل هێرشی کردە سەر باشووری بەیرووت لە لوبنان و فوئاد شوکر، کەسی دووەمی حیزبوڵڵای کوشت، دواتریش پشتڕاستی کردەوە؛ رۆژێک دوای ئەوە هەنییە لە تاران کوژرا.
جیهان لە چاوەڕوانی هێرشی ئێران و حیزبوڵلایە بۆ سەر ئیسرائیل. بۆ ئەم مەبەستە، چەندین وڵات داوایان لە هاووڵاتییەکانیان کردووە لوبنان و تاران بەجێبهێڵن؛ لەوانەش: ئەمریکا، فەرەنسا، ئوردن، کەنەدا و سوێد.
بزووتنەوەی حەماس دوای هەفتەیەک لە کوژرانی هەنییە ناوی یەحیا سینواریان وەک سەرۆکی نوێی مەکتەبی سیاسیی بزووتنەوەکە دەستنیشان کرد. ئیسرائیل سینوار بەوە تۆمەتبار دەکات کە ئەو ئەندازیار و پلانداڕێژەری هێرشەکەی 7ـی ئۆکتۆبەری حەماس بوو بۆ سەر ئیسرائیل.
دوای هەڵبژاردنی سینوار، شڕۆڤەکاران پێیانوایە سینوار کەمتر لە هەنییە ویستی رازیبوونی بە ئاگربەست هەیە و زیاتر لە هەنییە لە تاران نزیکە.
چوارشەممە 07-08-2024، دانیاڵ هەگاری، گوتەبێژی سوپای ئیسرائیل، رایگەیاند ئەوان بەردەوام دەبن لە بەئامانجکردنی سەرجەم سەرکردەکانی حەماس و هەموو ئەوانەی بەرپرسیار بوون لە هێرشەکانی 7ـی ئۆکتۆبەر، لەوانەش یەحیا سینوار.
هەگاری لەبارەی شوێنگرتنەوەی ئیسماعیل هەنییە، لەلایەن سینوارەوە رایگەیاند: "ئەو، تیرۆرستێکی گەورەیە و ئیسرائیلیش بەردەوام دەبێت لە گەڕان بەدوایدا. تەنیا شوێنێک کە جێگەی یەحیا سینواری تێدا دەبێتەوە، تەنیشت محەممەد زەیف و غەندوور و ئەیمەن نەوفەلە (فەرماندەکانی حەماس کە لە جەنگی غەززەدا کوژراون)، لە تەنیشت هەموو ئەو تیرۆریستانەی لە هێرشەکانی 7ـی ئۆکتۆبەر بەرپرسیار بوون."
سینوار پێش بەرزکردنەوەی پلەکەی، بەرپرسی حەماس بووە لەنێو کەرتی غەززە و باڵاترین بەرپرسی ئەو بزووتنەوەیەشە لەنێو کەرتەکە. بەگوێرەی زانیارییەکانی ئیسرائیل، سینواری تەمەن 61 ساڵ، لەسەرەتای جەنگەکەوە لەنێو توونێلەکانی نێو غەززە خۆی حەشارداوە و چەند جارێکیش نزیک بوونە لە بە ئامانجگرتنی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ