رووداو دیجیتاڵ
هێزی ئاشتیپارێزی نەتەوە یەکگرتووەکان لە لوبنان - یونیفیل، لە بارەی شەڕی نێوان گرووپەکانی فەلەستین و ئیسرائیل رایگەیاند، لەگەڵ لایەنە پەیوەندیدارەکان لە هاوئاهەنگیدان بۆ کەمکردنەوەی گرژی لە ناوچەکە.
هێزەکە لە راگەیێندراوێکدا دەڵێت: "هەموو لایەنەکان هاندەدەین دان بە خۆیاندا بگرن و لە رێگەی یونیفیلەوە هاوئاهەنگ بکەن بۆ کەمکردنەوەی گرژییەکان و رێگریکردن لە تێکچوونی دۆخی ئەمنی."
پێشتریش ئەندریا تێنێنتی، گوتەبێژی یونیفێل رایگەیاندبوو: "سەربازانی هێزی ئاشتیپارێز بە درێژایی هێڵی شین ئامادەن بۆ پاراستنی سەقامگیری و یارمەتیدان لە رێگریکردنی دروستبوونی تووندوتیژی."
مەبەست لە هێڵی شین، ئەو هێڵە سنووریەیە کە ساڵی 2000، نەتەوە یەکگرتووەکان لە نێوان لوبنان و ئیسرائیل و لوبنان و بەرزاییەکانی جۆلاندا کێشای بۆ ئەوەی هێزەکانی ئیسرائیل بۆ پشت ئەو هێڵە بکشێنەوە.
باخچەکانی شەبعا و کەفرشوبا لە جەنگی ساڵی 1967 لە لایەن ئیسرائیلەوە لە دەستی سووریا دەرهێنران کە بەشێکن لە بەرزاییەکانی جۆلانی سووری، کە ئیسرائیل لە ساڵی 1981ـەوە بە خاکی خۆیەوە لکاندوویەتی. حکومەتی لوبنانی دەڵێت، ئەو ناوچەیە لە بنەڕەتدا بەشێکە لە خاکی لوبنان.
هێزی ئاشتیپارێزی نەتەوە یەکگرتووەکان، لە ساڵی 1978ـەوە لە لایەن ئەنجوومەنی ئاسایشی نێودەوڵەتی پێکهێنراوە بۆ دڵنیابوونەوە لە کشانەوەی ئیسرائیل لە ناوچەکانی لوبنان کە لەو ساڵەدا دەستی بەسەردا گرتن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ