رووداو دیجیتاڵ
سەرۆکی ئۆکراینا بە مەبەستی کۆبوونەوە لەگەڵ سەرۆککۆماری تورکیا گەیشتە ئیستەنبووڵ.
دوای نیوەڕۆی رۆژی هەینی 8ـی ئاداری 2024، ڤۆلۆدیمیر زیلینسکی، سەرۆکی ئۆکراینا گەیشتە ئیستەنبووڵی گەورە شاری تورکیا.
بڕیارە زیلینسکی لە کۆشکی وەحدەدین پاشا لەگەڵ رەجەب تەیب ئەردۆغان، سەرۆککۆماری تورکیا کۆبێتەوە.
فەرمانگەی پەیوەندییەکان لە سەرۆکایەتیی کۆماری تورکیا بڵاویکردەوە، لە کۆبوونەوەکەدا پێشهاتەکانی تایبەت بە جەنگی ئۆکراینا و رووسیا، دوایین پێشهاتی پەیوەندیدار بە رێککەوتنی گواستنەوەی دانەوێڵە و پەیوەندییەکانی تورکیا و ئۆکراینا تاوتوێ دەکرێن.
لەو کاتەوەی جەنگی نێوان رووسیا و ئۆکراینا لە شوباتی 2022ـەوە هەڵگیرساوە، رەجەب تەیب ئەردۆغان 12 جار بە تەلەفۆن لەگەڵ ڤۆلۆدیمیر زیلینسکی قسەی کردووە و دووجاریش لەگەڵی کۆبووەتەوە؛ جاری یەکەم لە کیێڤ و جاری دووەم لە ئیستەنبووڵ.
هەر لە هەمان ماوەدا ئەردۆغان 12 جار بە تەلەفۆن لەگەڵ ڤلادیمیر پووتین، سەرۆکی رووسیا قسەی کردووە و چوار جاریش کۆبوونەتەوە.
تورکیا ئەندامی ناتۆیە و پەیوەندیی بەهێزی لەگەڵ رووسیا و ئۆکرایناش هەیە. ئەو پەیوەندییە هاوکار بوو بۆ ئەوەی رووسیا و ئۆکراینا رێککەوتنی تایبەت بە گواستنەوەی دانەوێڵە لە رێگەی دەریای رەشەوە لە 22ـی تەمموزی 2022 واژۆ بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ