لە دەوحە کۆبوونەوەیەکی بەپەلە لەبارەی سووریا...

گالەری

لە دەوحە کۆبوونەوەیەکی بەپەلە لەبارەی سووریا دەکرێت؛ هەشت وەزیری دەرەوە بەشدارن

07-12-2024

20 Photos

سەنگەر عەبدولڕەحمان @sangarrudaw

رووداو دەوحە

دۆخی سووریا ئاڵۆزە و دیمەشق لەژێر هەڕەشەی ئەوەیە بکەوێتە دەست چەکدارانی دەستەی تەحریری شام، ئەو گۆڕانکارییە بەپەلەیەش وایکرد ئەمشەو وەزیرانی هەشت وڵات لە دەحە لەبارەی رەوشی سووریا کۆببنەوە.

لە کۆبوونەوەکەی ئەمشەو (شەممە، 12-7-2024)ـی دەوحە وەزیرانی دەرەوەی رووسیا، ئێران، تورکیا، قەتەر، سعودیە، عێراق، میسر و ئوردن بەشدار دەبن.

فوئاد حوسێن، وەزیری دەرەوەی عێراق ئەمڕۆ لەدوای کۆبوونەوەی لەگەڵ سێرگی لاڤرۆڤ، وەزیری دەرەوەی رووسیا بە رووداوی گوت بۆ دۆخی سووریا دوو چارەسەر هەن؛ "یان لایەنی سەربازی، کە بە واتای ئاڵۆزیی چەکداری دێت لە سووریا، یان رێگەیەکی سیاسی کە ئەویش چارەسەری کێشە ناکات، بەڵکو ئیدارەی دەدات.

لەبارەی ئەجێندای کۆبوونەوەکەوەش، وەزیری دەرەوەی عێراق گوتبووی "باس لە رەوشی سووریا دەکرێت، هەڵسەنگاندنی بۆ دەکرێت لەسەر بنەمای زانیارییەکانی ئەم وەزیرانە. دووەم، هەڵوێستی ئەم وڵاتانە چۆن دەبێت، سێیەمیش، چۆن بارودۆخی سووریا چارەسەر دەکرێت."

کۆبوونەوەی هەشت وەزیرەکەی دەرەوە لەچوارچێوەی 22ـەمین کۆڕبەندی دەوحە دەکرێت کە لەژێر ناونیشانی "پێویستیی داهێنان" بەڕێوەدەچێت و، تێیدا باس لە دوایین ئاڵنگاری و ئاڵۆزییەکانی جیهان و ناوچەکە دەکرێت.

ماوەی نزیکەی هەفتەیەکە شەڕ بەرۆکی سووریای گرتووە و هێزەکانی دەستەی تەحریری شام و هێزە ئۆپۆزیسیۆنەکانی دیکەی حکومەتی سووریا لە دژی حکومەتەکەی بەشار ئەسەد شەڕ دەکەن.

سەنگەر عەبدولڕەحمان لەبارەی کۆڕبەندەکەوە دەڵێت، هیچ شاندێکی حکومەتی سووریا بەشدار نییە، بەڵام شاندی ئۆپۆزیسیۆنی وڵاتەکە لە کۆڕبەندەکە دا بەشدارن.