رووداو دیجیتاڵ
وەزارەتی دەرەوەی تورکیا بڵاویکردەوە، هاکان فیدان و ئەنتۆنی بلینکن هاوتا ئەمریکییەکەی بە تەلەفۆن قسەیان کردووە و باسی پێشهاتەکانی سووریایان کردووە.
بەپێی راگەیێندراوەکەی وەزارەتی دەرەوەی تورکیا؛ کە کاژێر 12:00ی نیوەشەوی هەینی 6-12-2024، بڵاوکرایەوە، لە پەیوەندییە تەلەفۆنییەکەدا سەبارەت بە دوایین پێشهاتە مەیدانییەکانی سووریا، هاکان فیدان بە ئەنتۆنی بلینکن راگەیاند، پێویستە هەڵەکانی رابردوو دووبارە نەکرێنەوە. دەبێ رژێمی سووریا لەگەڵ ئۆپۆزسیۆن دەست بە دیالۆگ بکات و هەنگاو بەرەو پرۆسەیەکی سیاسیی نوێ بنێت.
هاکان فیدان داوای کردووە، سەرجەم وڵاتە کاریگەرەکانی ناوچەکە رۆڵی ئەرێنی بگێڕن و کار بکەن بۆ هێورکردنەوەی دۆخەکە.
وەزیری دەرەوەی تورکیا لەم پەیوەندییە تەلەفۆنییەدا هۆشداری داوە لەبارەی چەکە کیمیاییەکانی ژێر دەستی حکومەتی سووریا و رایگەیاندووە، لە "ئەگەری بەکارهێنانی ئەم چەکە کیمیاییانە، رژێم تاوانی زۆر گەورەتر ئەنجام دەدات بەراورد بەو تاوانانەی پێشتر کردوونی."
هاکان فیدان بە هاوتا ئەمریکییەکەشی گوتووە، کە دەبێ هەمووان رێوشوێنی پێویست بگرنەبەر.
وەزیری دەرەوەی تورکیا باسی لەوەشکردووە. "لەم دۆخە هەستیارەدا خەڵکی زۆر ئاوارە و دەربەدەربوون و لە هەموو کات زیاتر پێویستیان بە هاوکاریی مرۆیی بەپەلەیە." ئامادەیی وڵاتەکەی نیشانداوە لەپێناو گەیاندنی هاوکاری و کۆمەکی خێرا بۆ ناوچە جیاوازەکانی سووریا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ