نووری مالیکی پێشوازی لە هێرشەکانی حەماس بۆ سەر ئیسرائیل دەکات

 

ئەمڕۆ شەممە، 7ـی تشرینی یەکەمی 2023، نووری مالیکی، سەرۆکی هاوپەیمانیی دەوڵەتی یاسای عێراق رایگەیاند، "بە شانازی و پێزانینەوە چاودێریی هێرشی ئازا و پلانی سەرکەوتووی هێزەکانی قەسام و برایانی موجاهیدان لە گرووپە چەکدارە موجاهیدەکانی دیکە دژی داگیرکاری زایۆنی دەکەین."

 

نووری مالیکی دەڵێت،  ئەو ئۆپەراسیۆنە لە دەرەوەی توانا و بیرکردنەوەی "هێزەکانی داگیرکار و  حکومەت و دوژمن بووە، لە رێگەی ئاراستەکردنی هەزاران مووشەک و دزەکردنی ژمارەیەک موجاهیدی فەلەستینی بۆ نێو قووڵایی قەوارە و کۆنترۆڵکردنی بنکەیەکی سوپای داگیرکار و بەدیلگرتنی ژمارەیەک سەربازی زایۆنی." 

 

ئەوە لەکاتێکدایە، بەیانیی ئەمڕۆ شەممە، 7ـی تشرینی یەکەمی 2023، سوپای ئیسرائیل لە راگەیێندراوێکدا گوتی، ژمارەیەک چەکدار لە کەرتی غەزەوە دزەیان کردووەتە نێو خاکی ئیسرائیل، دوای ئەوەی دەیان مووشەک لەوێوە ئاراستە کران. 

 

لە چەند گرتە ڤیدیۆیەکدا دەردەکەوێت، ژمارەیەک چەکدار لە غەزەوە بەرەو خاکی ئیسرائیل دەپەڕنەوە و تەقە دەکەن.

 

کەتائیبی عیزەدین قەسام کە باڵی چەکداریی بزووتنەوەی حەماسە، لە راگەیێندراوێکدا دەڵێت، "ئۆپەراسیۆنی گەردەلوولی ئەقسا رادەگەیێنین و لە 20 خولەکی یەکەمدا سەروو 5,000 مووشەکمان تەقاندووە." باڵە چەکدارییەکەی حەماس دەشڵێت، "بڕیارماندا کۆتایی بە هەموو تاوان و داگیرکارییەکی (ئیسرائیل) بهێنین." 

 

بەگوێرەی ئاژانسی فرانس پرێس، مووشەکبارانکردنەکە کاژێر6:30 خولەکی بەیانیی ئەمڕۆ بەکاتی غەزە [هەمان کاتی هەولێر] دەستیپێکردووە. 

 

حەماس لە راگەیێندراوێکدا داوای لە چەکدارەکانی لە کەرتی رۆژئاوا و "وڵاتانی عەرەبی و ئیسلامی" کرد لە شەڕەکەدا هاوکارییان بکەن.