هۆشدارییەک لە سەرۆکوەزیرانی ئیسرائیلەوە: لە غەززە دووربکەونەوە، دەیکەینە وێرانە

 

سەرۆکوەزیرانی ئیسرائیل ئەمشەو (شەممە، 7-10-2023) لە پەیامێکی ڤیدیۆییدا دانیپێدانا کە "ئەمە رۆژێکی رەشە بۆ ئیسرائیلییەکان و لە مێژووی ئیسرائیلدا رووینەداوە،" گوتیشی "حەماس دەیەوێت بمانکوژێت.. ئیسرائیل لەم جەنگەدا سەردەکەوێت، بەڵام باجەکەی قورس دەبێت."

 

سەرۆکوەزیرانی ئیسرائیل هەروەها گوتی، "حەماس بەرپرسە لە سەلامەتیی دیلە ئیسرائیلییەکان،" کە بە گوتەی میدیای ئیسرائیلی، تاوەکو ئێستا ژمارەیان 35 کەسە. 

 

سەرۆکوەزیرانی ئیسرائیل جەختی کردەوە لەوەی ئێستا هێزەکانیان "دوایین ئۆردووگاکان کۆنترۆڵدەکەنەوە کە چەکدارەکان دزەیانکردووەتە نێویان،" بەڵام نەیشاردەوە کە "ئەم جەنگە درێژە دەکێشێت و هێشتا رۆژی ناخۆشمان لە پێشە."

 

هەروەها هەڕەشەشی کرد  و گوتی، "لە هەموو شوێنێک بە هێزەوە لە حەماس دەدەین."  

 

میدیای ئیسرائیلی دەڵێت، ژمارەی کوژراوانی ئیسرائیلی گەیشتووەتە 250 کەس، هەزار و 500ـی دیکەش برینداربوون، کە 290ـیان لە دۆخێکی مەترسیداردان. تەندروستیی غەززەش رایگەیاند، ژمارەی ئەوانەی بەهۆی هێرشە ئاسمانییەکانی ئیسرائیلەوە گیانیان لەدەستداوە، گەیشتووەتە 232 کەس و هەزار و 700ـی دیکەش بریندار بوون.

 

کەتائیبی قەسام، باڵی سەربازیی بزووتنەوەی بەرخودانی ئیسلامی (حەماس)، بەیانیی ئەمڕۆ دەستی بە ئۆپەراسیۆنێکی سەربازی کرد، هەزاران مووشەکی ئاراستەی ئیسرائیل کرد و چەکدارەکانی دزەیان کردە نێو ئۆردووگا جوونشینەکان. 

 

لە بەرامبەردا، ئیسرائیل ئۆپەراسیۆنێکی سەربازیی بۆ سەر غەززە دەستپێکرد و، ژمارەیەک هێرشی ئاسمانیی کردنە سەر ناوچە جیاجیاکانی. 

 

محەممەد زەیف، فەرماندەی گشتیی کەتائیبی قەسام رایگەیاند، ئۆپەراسیۆنی "تۆفانی ئەقسایان" دژی ئیسرائیل دەستپێکردووە. زەیف لە تۆمارێکی دەنگیدا رایگەیاند، لە گورزی یەکەمدا، زیاتر لە 5 هەزار مووشەکیان ئاراستەی ئیسرائیل کردووە.