دەستەی تەحریر شام بۆ چین و رووسیا: رەوەند و نێردە دیپلۆماسییەکانتان پارێزراون

 

لە راگەیێندراوێکدا، شەوی هەینی 6ـی کانوونی یەکەمی 2024 بڵاوکرایەوە، بەڕێوەبەرایەتیی کاروباری سیاسیی سەر بە دەستەی تەحریری شام، داوایەک ئاراستەی رەوەند و نێردە دیپلۆماسییەکانی چین و رووسیا لە سووریا دەکات متمانەیان پێبکەن و بەڵێنیان پێدەدات، شەڕەکەیان لە دژی ئەوان نییە. 

 

لە راگەیێندراوەکەدا هاتووە؛ " دڵنیاتان دەکەینەوە جەنگی گەلی سووریا جەنگی رزگارکردنی خاک و نیشتمانە لەژێر چنگی رژێمی ئەسەدی تاوانکار. جەنگی ئێمە جەنگی دژ بە هیچ وڵاتێکی بیانی و رەوەندەکانیان نییە."

 

بەڕێوەبەرایەتیی کاروباری سیاسیی دەستەکە باس لەوە دەکات: "پێداگری لەوە دەکەین رەوەندەکانتان لە سووریا تەواوی مافەکانیان پارێزراو دەبێت و لەوپەڕی ئارامیدا دەبن و پاراستنی رەوەندەکان و نێردە دیپلۆماسییەکانیشتان ئەرکمانە." 

 

تەحریر شام داوا لەو دوو وڵاتە دەکات: "پشتیوانی لە ئیرادەی گەلی سووریا بکەن بۆ رزگاربوونیان لەژێر دەستی ستەم و تاوانکاری. با پێکەوە پەیوەندیی دیپلۆماسیی هاوبەش لەسەر بنەمای رێزگرتنی نێوان گەلانمان پێکبهێنین. پێکەوە کاربکەین بۆ گەشەپێدان و ئاوەدانکردنەوەی زیاتری وڵاتەکانمان. هەروەها پێکەوە بەرژەوەندییە هاوبەشەکانمان بپارێزین." 

 

پێشتر چین و رووسیا نیگەرانییان لەبارەی پێشهاتەکانی سووریا دەربڕی و داوایان لە رەوەندەکانیان کرد بە زووترین کات، سووریا جێبهێڵن. 

 

هێرشی دەستەی تەحریری شام لە 25ی مانگ دەستیپێکردووە و لە 27ی مانگ چوونە نێو حەلەب. ئێستا پێشڕەوییەکانیان بەرەو پارێزگای حومس بەردەوامە.