رۆژهەڵاتی نێوەڕاست
بەردەوامی و چڕیی بۆردوومانەکانی ئیسرائیل، رێگرن لە بەردەوامبوونی کاری تیمەکانی فریاگوزاری. وێنە: AA
prev
next
رووداو دیجیتاڵ
دیمەنی گواستنەوەی برینداران و بەخاکسپاردنی کوژراوانی کەرتی غەززە، بووەتە دیاردە و رۆژانە لە کەرتی غەززە چەندبارە دەبێتەوە. هاووڵاتییانی ئەو کەرتە لەنێوان خەمی لەدەستدانی کەسوکارەکانیان، دڵەڕاوکێی چارەنووسی بریندارەکانیان و بێسەروشوێنبووەکاندا دەژین.
بەپێی ئامارە فەرمییەکان، زیاتر لە 2100 کەس بێسەروشوێنن، کە 1200یان منداڵن. عەبدوڵڵا دانیشتووی غەززەیە و لەنێو خەم و ئازاری گیانلەدەستدانی ژمارەیەکی زۆری ئەندامانی خێزان و مانەوەی کچەکانیدا دەژی، کە نزیکەی 40 کاژێرە لەژێر داروپەردوون و هەوڵی رزگارکردنیان دەدات.
عەبدوڵڵا ئەبوشەمالە، دانیشتووی غەززە دەڵێت، "دوای گەڕانەوەم لە کارکردن، بینیم خانووەکەمان بە تەواوەتی خاپوور بووە، هاوژینەکەم و زۆربەی ئەندامانی خێزانەکەم شەهید بوون. پێنج کەسیان ماون، بە کچەکانیشمەوە، ئەوانیش لەژێر داروپەردوودان. شەو نەخەوتووم، هەوڵدەدەم و هاوار دەکەم بۆئەوەی کچەکانم دەربهێنم. دوای 11 ساڵ، خوای گەورە ئەم دوو کچەی پێداوم، ئەوانیش ئێستا لەژێر داروپەردوون و هیوادارم بتوانم رزگاریان بکەم."
ئەحمەدیش هەمان ئازار و مەینەتیی هەیە؛ خەمبارە بەهۆی لەدەستدانی خۆشەویستانی و لە خەمی رزگارکردنی کەسوکاریەتی لەژێر داروپەردووی باڵەخانە رووخاوەکاندا.
ئەحمەد حەموودە، دانیشتووی غەززە دەڵێت، "خوشکم و کوڕە تەمەن سێ هەفتانەکەی و دوو کچیشی، کە یەکێکیان حەوت ساڵە و ئەوی دیکەشیان پێنج ساڵە، شەهید بوون. کچە سێ ساڵانەکەشی لەژێر داروپەردوودا ماوەتەوە و چارەنووسی نادیارە."
بەردەوامی و چڕیی بۆردوومانەکانی ئیسرائیل، رێگرن لە بەردەوامبوونی کاری تیمەکانی فریاگوزاری بۆ دۆزینەوە و رزگارکردنی هاووڵاتییان و دەرهێنانیان لەژێر داروپەردووەکاندا.
رائید محەممەد سیام، گوتەبێژی بەرگریی شارستانیی غەززە ئاماژە بەوە دەکات، "بەهۆی بۆردوومانە چڕەکانی ئیسرائیل، کە رۆژانە دەکرێت، ماڵوێرانییەکی زۆری لێکەوتووەتەوە و بەهۆیەوە ئەستەمە بتوانین خەڵکی زۆر لە شەو و رۆژێکدا رزگار بکەین. کاتێک سەرقاڵی رزگارکردنی چەند کەسانێک دەبین، لە لایەکی دیکەوە 10 خانووبەرەی دیکە بۆردوومان دەکرێن، ئەمەش ئەرکی ئێمە قورستر دەکات. سەرباری ئەمەش، کەرەستە و ئامێری پێویستیشمان نەماوە."
وەزارەتی نیشتەجێبوونی فەلەستین ئاشکرای دەکات، بەهۆی بۆردوومانەکانی ئیسرائیلەوە، تائێستا 25%ی خانوو و باڵەخانەکانی کەرتی غەززە خاپوور کراون.
خەڵک لە غەززە لەنێوان پرسە بۆ شەهیدەکانیان و چاودێریکردنی بریندارەکانیان و خەمی چارەنووسی بێسەروشوێنبووەکانیاندان؛ چاوەڕێی ساتێک دەکەن بۆ راگەیاندنی ئاگربەست و وەستانی شەڕەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ