مقاوەمەی ئیسلامی لە عێراق: هێرشمان کردە سەر ئیسرائیل

 

گرووپی مقاوەمەی ئیسلامی لە عێراق کە ژمارەیەک میلیشیای شیعە لەخۆدەگرێت راگەیێندراوێکی لەبارەی هێرشەکەی ئەمڕۆیانەوە بۆ سەر ئیسرائیل بڵاوکردەوە و رایگەیاند: " بەرەبەیانی ئەمڕۆ پێنجشەممە، لەرێگەی درۆنێکەوە شوێنێکمان لە ئیشدود لە خاکی داگیرکراو کردە ئامانج."

 

گرووپەکە راشیگەیاندووە "لەچوارچێوەی قۆناخی دووەمی ئۆپەڕاسیۆنەکانی مقاوەمەی داگیرکار و بۆ پشتیوانی لە کەسوکارمان لە غەززە لە وەڵامی ئەو هێرشانەی زایۆنی لە دژی هاووڵاتیانی فەلەستینی دەیانکات، بەردەوام دەبین لە کردنە ئامانجی مۆڵگەی دوژمنان."

 

ئەو گرووپە هەروەها گرتەی ڤیدیۆیی هێرشەکەی بڵاوکردووەتەوە کە بە گوتەی خۆیان هێرشەکەی ئەمڕۆ 4ـی نیسانی 2024ـە، جگە لە بڵاوکردنەوەی گرتەیەکی دیکەی ڤیدیۆیی، گوایە تایبەتە بە هێرشێکیان بۆ سەر بنکەی ئاسامانیی رامات دەیڤید کە رۆژی 3ـی ئەم مانگە کردوویانە.

 

گرووپە چەکدارەکەی شیعەکان ماوەیەکە هێرشەکانی بۆ سەر ئیسرائیل دەستپێکردووە کە ئەگەری هەیە بەهۆی ئەو هێرشانەوە عێراق بکرێتە ئامانج.

 

مقاوەمەی ئیسلامی لە عێراق لە 17ـی ئۆکتۆبەری 2023، لە عێراق و سووریا، هەرێمی کوردستان و رۆژئاوای کوردستان دەستیان بە هێرشەکانیان بۆ سەر هێزەکانی هاوپەیمانان بەتایبەتی ئەمریکا کرد. بەڵام دوای ئەوەی ئەمریکا چەند جارێک بەتووندی وەڵامی دانەوە، لەوانەش کوشتنی ئەبو باقر ساعیدی، فەرماندەی کەتیبەکانی حیزبوڵڵای عێراق لە شەوی چوارشەممە، 07-02-2024، لە نێو جەرگەی بەغدا، گرووپەکە هیچ هێرشێکی دیکەی نەکردووەتە سەر هێزەکانی ئەمریکا لە عێراق و سووریا.