نەتەوە یەکگرتووەکان: زیاتر لە نیوەی باڵەخانەکانی غەززە رووخاون یان زیانیان پێگەیشتووە

 

 

رۆژی دووشەممە 03-06-2024 ئاژانسی شیکاریی سەتەلایتەکانی نەتەوە یەکگرتووەکان UNOSAT لە تۆڕی کۆمەڵایەتیی ئێکس بڵاویکردەوە، "137 هەزار و 297 باڵەخانەی غەززە لە ماوەی هەشت مانگی جەنگدا رووخاون یان زیانی جۆراوجۆریان بەرکەوتووە."

 

ئاژانسەکە پشتی بە وێنەی مانگی دەستکردی 03-05-2024 و وێنەکانی ئایاری 2023 و 11ی ئۆکتۆبەری 2023 بەستووە.

 

ئەو ئاژانسەی نەتەوە یەکگرتووەکان ئاماژە بەوە دەکات، "بەگوێرەی وێنەکانی مانگی دەستکرد، 36591 باڵەخانە بە تەواوی رووخاون. 16513 باڵەخانە زیانی زۆریان بەرکەوتووە. 47368 باڵەخانە زیانی مامناوەندیان بەرکەوتووە و 36825 باڵەخانەش زیانی کەمیان بەرکەوتووە."

 

ئەوەی لە راپۆرتی ئاژانسەکەی سەر بە نەتەوە یەکگرتووەکاندا هاتووە ئەوەیە، زۆرترین زیان بەر بینا و باڵەخانەی ناوچەکانی دێربەلەح، نێوەڕاستی غەززە و شاری غەززە لە باکوور کەوتووە؛ زۆرترین زیانیش لەنێوان 01-04-2024 بۆ 03-05-2024 بووە.

 

جەنگی غەززە لەدوای هێرشی باڵی سەربازیی بزووتنەوەی حەماس بۆ سەر ئۆردوگا جوونشینەکانی ئیسرائیل لە 7ی ئۆکتۆبەری رابردوو دەستیپێکرد. ئیسرائیل دەڵێت، "1189 کەسمان کوژراون و 252 کەسیش بە بارمتە گیراون. هێشتا 121 بارمتە لای حەماس ماون و 37یان کوژراون."

 

وەڵامی ئیسرائیل تووند و وێرانکەر بوو، هەشت مانگە جەنگ بەردەوامە. بەگوێرەی تەندروستیی غەززە، 36439 کەس کوژراون، کە زۆربەیان سڤیلن.