رووداو دیجیتاڵ
کۆشکی ئیلێزێی فەرەنسا دەڵێت، سەرۆکی وڵاتەکە لە سەردانەکەی بۆ میسر، هەفتەی داهاتوو سەردانی شاری عەریش دەکات کە نزیکە لە غەززە.
رۆژی پێنجشەممە 03-04-2025 کۆشکی سەرۆکایەتیی فەرەنسا رایگەیاند: "هەفتەی داهاتوو ئیمانوێل ماکرۆن، سەرۆکی فەرەنسا سەردانی میسر دەکات و دەچێتە شاری عەریش؛ لەوێ لەگەڵ کارمەندانی مرۆیی و ئەمنی کۆدەىیتەوە."
شاری عەریش نزیکەی 50 کیلۆمەتر لە شاری رەفەحی باشووری غەززە دوورە.
کۆشکی ئیلێزی راشیگەیاند: "سەرۆک ماکرۆن جەخت لە پشتگیریی تەواوی خۆی بۆ بڵاوەپێکردنی ئەو کارمەندانە، لە بەرژەوەندیی ئاگربەست دەکاتەوە."
شاری عەریش خاڵێکی گرنگی گواستنەوەی هاوکاریی نێودەوڵەتییە بۆ غەززە.
بڕیارە ماکرۆن رۆژی یەکشەممە 06-04-2025 سەردانی قاهیرە بکات و رۆژی دواتر لەگەڵ عەبدولفەتاح سیسی، سەرۆکی میسر کۆبێتەوە.
لەوکاتەوەی جەنگ لە 7ـی تشرینی یەکەمی 2023 دەستیپێکردووە، میسر لەگەڵ ئەمریکا و قەتەر وەک نێوەندگیرێک لە نێوان حەماس و ئیسرائیل کاریکردووە.
بەگوێرەی نووسینگەی ماکرۆن، سەرۆکی فەرەنسا جەخت لە "بەپەلەیی" راگەیاندنی ئاگربەستێک دەکاتەوە، "بۆ ئەوەی چیدیکە دانیشتووانی غەززە ئەو کارەساتە مرۆییە نەچێژن. بۆ ئەوەی بۆردوومانەکانی ئیسرائیل بوەستن و بارمتەکانیش ئازاد بکرێن."
بڕیاریشە لە ماوەی سەردانەکە، میسر و فەرەنسا واژۆ لەسەر رێککەوتننامەیەک بۆ چارەسەرکردنی بریندارانی فەلەستین بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ