رووداو دیجیتاڵ
بەرگریی شارستانیی غەززە دەڵێت، لە هێرشێکی ئاسمانیی ئیسرائیلدا بۆ سەر قوتابخانەیەکی غەززە 11 کەس کوژران. سوپای ئیسرائیلیش دەڵێت، هێرشیان کردووەتە سەر ناوەندێکی فەرماندەیی حەماس.
رۆژی یەکشەممە 01-09-2024 مەحموود بەسەڵ، گوتەبێژی بەرگریی شارستانیی غەززە رایگەیاند، لە بۆردوومانێکی ئیسرائیلدا بۆ سەر قوتابخانەی سەفەد 11 کەس کوژران لەوانەش، ژنێک و منداڵێکی کچ.
بە گوتەی بەسەڵ، قوتابخانەکە دەکەوێتە گەڕەکی زەیتوون لە باشووری رۆژهەڵاتی غەززە و چەندین ئاوارەی فەلەستینی تێدا بووە.
سوپای ئیسرائیلیش دوای هێرشەکە رایگەیاند، ناوەندێکی فەرماندەیی حەماسیان لە قوتابخانەی سەفەد کردووەتە ئامانج.
رۆژی 10-08-2024 بەرگریی شارستانیی غەززە رایگەیاند، ئیسرائیل بە مووشەک هێرشی کردە سەر قوتابخانەی تابعین لە گەڕەکی دەراج و نزیکەی 100 کەس کوژران.
ئیسرائیل دانی بە هێرشەکەدا نا و بڵاویکردەوە، "لە قوتابخانەی تابعین ناوەندێکی فەرماندەیی تیرۆریستیی حەماسمان کردە ئامانج. چەندین هەنگاومان گرتەبەر بۆئەوەی مەترسیی سەر ژیانی سڤیلەکان کەم بکەینەوە، لەوانەش چاودێریی شوێنەکەمان کرد و پێش هێرشکردن زانیاریی هەواڵگریمان کۆکردەوە."
لە هێرشێکی هاوشێوەدا لە 06-06-2024 بۆ سەر قوتابخانەیەکی شاری دێر بەلەح لە نێوەڕاستی غەززە، لانیکەم 33 کەس کوژران کە 12ـیان ژن و منداڵ بوون.
بەگوێرەی نەتەوە یەکگرتووەکان، لە 564 قوتابخانەی کەرتی غەززە، 477ـیان راستەوخۆ هێرشیان کراوەتەسەر یان زیانی گەورەیان بەرکەوتووە.
جەنگی غەززە لە 07-10-2023 دوای هێرشێکی بزووتنەوەی چەکداریی حەماس بۆ سەر ئۆردووگە جوونشینەکانی ئیسرائیل دەستی پێکرد. بەگوێرەی ئیسرائیل، ئەو رۆژە نزیکەی هەزار و 200 کەس کوژران و 250 کەسیش بە بارمتە بران. بەگوێرەی دوایین ئاماری تەندروستیی غەززەش، 40 هەزار و 738 کەس لە غەززە کوژراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ