میدیای فەرمیی سووریا: ئیسرائیل دوو فڕۆکەخانەی لە حەلەب مووشەکباران کرد
رووداو دیجیتاڵ
میدیای فەرمیی سووریا رایدەگەیێنێت، ئیسرائیل فڕۆکەخانەی نێودەوڵەتیی حەلەب و فڕۆکەخانەیەکی سەربازیی لە پارێزگاکەدا بۆردوومان کردووە؛ لە ئەنجامدا سەربازێکی سوپای سووریا کوژراوە و حەوت کەسی دیکەش برینداربوون کە دووانیان هاووڵاتی سڤیلن.
بەرەبەیانی رۆژی سێشەممە، 2ـی ئایاری 2023، میدیای فەرمیی سووریا بڵاویکردەوە: "نزیکەی کاژێر 11:35 شەوی دووشەممە، ئیسرائیلی دووژمن بە چەند مووشەکێک فڕۆکەخانەی نێودەوڵەتیی حەلەب و چەند ناوچەیەکی دیکەی دەوروبەری حەلەبییان کردە ئامانج."
لە هێرشەکەدا، بەپێی راگەیێندراوی فەرمیی سووریا، "سەربازێکی سوپای سووریا کوژراوە، 7 کەسی دیکەش برینداربوون و فڕۆکەخانەی حەلەبیش لە کارکەوتووە."
سەرچاوە خۆجێییەکانی سووریا ئاماژە بەوە دەکەن، چەند مووشەکێک لە ناوچەی سەفیرە لە پارێزگای حەلەب کەوتوونەتە خوارەوە و زیانێکی زۆری مادی لێکەوتووەتەوە. هاوکات چەند تەقینەوەیەک لە فڕۆکەخانەی نێودەوڵەتیی حەلەب و فڕۆکەخانەی سەربازی نەیراب لە پارێزگای حەلەب روویداوە و بەو هۆیەوە چەند کۆگایەکی چەک و تەقەمەنی تەقیونەتەوە.
ئەو هێرشانە لە کاتێکدان کە بەرەبەیانی رۆژی شەممە 29-4-2023، سوپای ئیسرائیل چەند کۆگایەکی چەک و تەقەمەنیی رێکخراوی حیزبوڵڵایان لە فڕۆکەخانەی سەربازی حمس کردە ئامانج و بەو هۆیەوە سێ هاووڵاتیی سڤیل گیانیان لەدەستدا.
لە ماوەی شەڕی 10 ساڵەی نێوخۆی سووریادا، ئیسرائیل سەدان هێرشی ئاسمانی کردووەتە سەر سووریا و بەشێوەیەکی سەرەکی پێگەکانی هێزەکانی نزیک لە ئێران، حیزبوڵڵای لوبنان و سوپای سووریا دەکاتە ئامانج.