رووداو دیجیتاڵ
دەستەی گشتیی چاودێریی کاروباری مزگەوتی (حەرام و مزگەوتی پێغەمبەر) رایگەیاند، لە مانگی رەمەزانی ئەم ساڵدا زیاتر لە 16 ملیۆن کەس بە مەبەستی عومرە سەردانی مەککەیان کردووە.
دەستەکە ئاماری ئەم ساڵی سەردانیکارانی مزگەوتی (حەرام) لە مەککە و مزگەوتی (پێغەمبەر) لە مەدینە بڵاوکردووەتەوە. بەپێی ئامارەکە 122 ملیۆن و 286 هەزار و 712 کەس سەردانی هەردوو مزگەوتەکەیان کردووە.
بە گوێرەی ئامارەکە 16 ملیۆن و 558 هەزار و 241 کەس لە مانگی رەمەزانی ئەم ساڵدا عومرەیان کردووە.
ژمارەی ئەو کەسانەی ئەم ساڵ لە رەمەزاندا عومرەیان کردووە، بەراورد بە ساڵی رابردوو دوو هێندە زیادی کردووە، پار لە مانگی رەمەزاندا هەشت ملیۆن و 235 هەزار و 680 کەس عومرەیان بەجێگەیاندووە.
لە هەرێمی کوردستانیش ساڵانە خەڵکێکی زۆر لە مانگی رەمەزاندا لە رێگەی کۆمپانیاکان یان بە ئۆتۆمبێلی خۆیان گەشتی عومرە دەکەن.
هەر بەپێی ئاماری دەستەی گشتیی چاودێریی کاروباری مزگەوتی (حەرام و مزگەوتی پێغەمبەر) 75 ملیۆن و 573 هەزار و 928 نوێژخوێن سەردانی مزگەوتی حەرام و 30 ملیۆن و 154 هەزار و 543 نوێژخوێن لە مزگەوتی پێغەمبەر لە مەدینە نوێژیان کردووە.
سەبارەت بە چۆنیێتی کۆکردنەوەی ئەو ئامارە، دەستەی گشتیی چاودێریی کاروباری مزگەوتی حەرام و مزگەوتی پێغەمبەر رایگەیاندووە، تەکنەلۆژیای پێشکەوتوو بەکاردەهێنێت، پشت بە هەستەوەرەکان دەبەستێت بۆ چاودێریکردنی ژمارەی عومرەکان و ئەو نوێژخوێنانەی سەردانی هەردوو مزگەوتەکە دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ