دەمیرتاش: وەکو سەرکۆنەیەک بەشداری لە بەخاکسپاردنی تەرمی باوکمدا ناکەم

 

 

دوای نزیکەی ساڵێک لە تووشبوونی بە نەخۆشیی دڵ، بەیانیی رۆژی یەکشەممە، 31-12-2023، تاهیر دەمیرتاش، باوکی سەلاحەدین دەمیرتاش، هاوسەرۆکی پێشووتری هەدەپە لە نەخۆشخانەیەکی ئامەد کۆچی دوایی کرد. 

 

 

لە راگەیێندراوێکدا کە لە تۆڕی کۆمەڵایەتیی ئێکس بڵاویکردووەتەوە هاتووە: "باوکی هاوسەرۆکی خولی پێشووی هەدەپە سەلاحەدین دەمیرتاش کە بە بارمتە گیراوە، ئەم بەیانییە کۆچی دوایی کرد. خەمەکەمان گەورەیە، سەرەخۆشی لە سەلاحەدین دەمیرتاشی خۆشەویست، ماڵباتەکەی و پارتەکەمان دەکەین. هیوادارین جێی تاهیر دەمیرتاش بەهەشت بێت کە رۆڵەی وەهای پەروەردەکردوون، تەمەنیان لە تێکۆشان بەسەربردووە".

 

دەم پارتی هەروەها رایگەیاندووە، ئەوانەی رێگرییان کرد لەوەی کۆچکردوو لە دوایین ساتەکانی تەمەنیدا نەتوانێت لەگەڵ ئازیزانی بێت، لەنێو ئەو ژینگەیە پڕ لە ستەمەدا دەخنکێن کە خۆیان دروستیانکردووە.

 

 

 

ئەگەرچی پارێزەرانی دەمیرتاش هەوڵیاندا داوای مۆڵەتی کاتی بکەن بۆ ئەوەی بریکارگرتەکەیان لە رێوڕەسمی بەخاکسپاردنی باوکیدا ئامادە بێت، بەڵام رایانگەیاند دەمیرتاش گوتوویەتی: "سەرکۆنەی ئەوە دەکەم کە وەکو بارمتەیەکی سیاسی لە زیندانم، بۆیە بەشداری لە رێوڕەسمەکەدا ناکەم".

 

تەرمی باوکی دەمیرتاش نیوەڕۆی یەکشەممە لە گۆڕستانی قاپی لە مێردینی باکووری کوردستان بە خاک سپێردرا. 

 

 

تولای هاتیمئۆغوڵڵار، هاوسەرۆکی گشتیی پارتی یەکسانی و دیموکراسیی گەلان – دەم پارتی بە پەیامنێری تۆڕی میدیایی رووداوی گوت: "زۆر لە هەڤاڵانمان وەکو بارمتەی سیاسی گیراون. بەشێکیان لە کاتی زیندانییاندا کەسوکاریان لەدەستداوە. ئەوان بەهۆی ئەوەی بەشێوەیەکی نایاسایی بەندکراون، نەیانتوانیوە کۆتایی بە حەسرەت و دووریی نێوانیان بهێنن و بۆ دوایین جارەکان ئازیزانیان نەبینیوە. لەڕاستیدا ئەمە ستەمە و ئەشکەنجەیە. ئەمە بەسەر سەرۆک گولتان و سەرۆک فیگەنیش هات. ئێمە ئەم ستەمە پەسندناکەین. دەبێت چی زووە کۆتایی بێت و ئەو هەڵوێستەی دەمیرتاشیش وەکو ناڕەزاییەک لە بەرامبەر نەبوونی یاسا دەبینین".

 

 

یەکەمین پەیامی سەلاحەدین دەمیرتاش دوای کۆچی دوایی باوکی، دەستنووسێکی خۆیەتی و لەلایەن دەم پارتی بڵاوکرایەوە. لەو دەستنووسەدا دەمیرتاش نووسیویەتی: "خەمت نەبێت باوکە! دڵمان لەم کونجی زیندانە گەورەترە. گەردنم ئازاد بکە. هەزار جار دەستی ماندووی رەنجدەریت ماچ دەکەم. شوێنت بەهەشت بێت". دەمیرتاش لە بەشی دووەمی پەیامەکەیدا سوپاسی هەموو ئەو کەسانەی کردووە کە هاوخەمی و سەرەخۆشییان کردووە. 

 

 

کەمال کڵچدارئۆغڵو لە تویتێکدا کە کاژێر 01:00ی دوای نیوەڕۆ بڵاویکردەوە، نووسیویەتی: "هیوادارم خوای گەورە رەحم بە تاهیر دەمیرتاش؛ باوکی کۆچکردووی بەڕێز سەلاحەدین دەمیرتاش بکات. پرسە و سەرەخۆشیی خۆم ئاراستەی ماڵباتی دەمیرتاش و نزیکەکانی دەکەم".

 

 

سەلاحەدین دەمیرتاش دوای وەرگرتنی رەزامەندیی وەزارەتی دادی تورکیا، رۆژی 6-5-2023، لە گرتووخانەی سزا قورسەکانی پارێزگای ئەدیرنەوە بە فڕۆکەیەکی تایبەت چووە ئامەد و لە نەخۆشخانە سەردانی تاهیر دەمیرتاشی باوکی کرد. ئەوکاتەش تاهیر دەمیرتاش تەندروستیی ناجێگیر بوو و جەڵتەی دڵ لێیدابوو. دەمیرتاش بۆ دڵنیابوونەوە لە تەندروستیی باوکی سەردانەکەی کردبوو.

 

 

سەلاحەدین دەمیرتاش رۆژی 4ـی تشرینی دووەمی 2016 بە تۆمەتی "تیرۆر" دەستگیرکرا و تاوەکو ئێستا لە گرتووخانەی ئەدیرنە بەندکراوە. دادگەی مافی مرۆڤی ئەوروپا تشرینی دووەمی 2018 داوای ئازادکردنی دەمیرتاشی کرد، بەڵام رەجەب تەیب ئەردۆغان، سەرۆککۆماری تورکیا ئەوکاتە گوتی، "ئەم بڕیارە ئێمە پابەند ناکات" و ئەنقەرە جێبەجێی نەکرد. 

 

وەزیرانی دەرەوەی ئەنجوومەنی ئەوروپا بڕیاریدا و بە پێویستی زانی دەمیرتاش ئازادبکرێت. هەروەها کانوونی دووەمی 2020یش بڕیارەکەی دووپاتکردەوە و ئاماژەی بەوە کرد کە تورکیا بە جێبەجێنەکردنی بڕیارەکە، پێشێلکاریی کردووە، بەڵام ئەمەش بێهودە بوو و تورکیا پێداگر بوو لەسەر هێشتنەوەی دەمیرتاش کرد لە گرتووخانە.