پەیامی سەرۆک بارزانی لەبارەی پێکهێنانی حکومەت

 

 

سەرۆک بارزانی ئەوەشی گوت کە کاتی ئەوەیە بیر لە پرۆژەی ستراتیژی بکرێتەوە و گرنگی بە کشتوکاڵ، پەروەردە و گەشتوگوزار بدرێت. 

 

سەرۆک مەسعود بارزانی رایگەیاند، شانازی بەوەوە دەکەن کە هەڵبژاردن لە کەشێکی ئارامدا بەڕێوەچووە کە زۆر کەس پێشبینییان کردبوو کێشە رووبدەن و تا رادەیەک کە هەڵبژاردنیش نەکرێت. 

رۆژی چوارشەممە، کۆمیسیۆنی هەڵبژاردنەکانی عێراق ئەنجامی فەرمیی هەڵبژاردنی پەرلەمانی کوردستانی بڵاوکردەوە. بەپێی ئەنجامەکان، پارتی 39 کورسی، یەکێتی 23 کورسی و نەوەی نوێش بە 15 کورسی لە پلەکانی یەکەم تاوەکو سێیەمی براوەکانن.

 

پێوەریش بۆ گفتوگۆی لایەنەکان، وەکو سەرۆک بارزانی باسی کرد، دەبێت بەرکەوتەی هەڵبژاردن و دەنگی لایەنەکان بێت. 

سەرۆک مەسعود بارزانی باسی لە سەروەریی یاسا کرد و گوتی، "دەبێت بە جدی رێگری بکرێت لەو کارە نایاساییانەی دەکران، وەکو دروستکردنی کارخانەی مادەی هۆشبەر، بازرگانیکردن بە مادەی هۆشبەر، یان تیرۆر و لادان لە یاسا. دەبێت سنوورێک بۆ ئەم شتانە دابنرێت."

گوتەکانی سەرۆک مەسعود بارزانی لە چوارچێوەی دیداری تەندروستیی میزۆپۆتامیا بوو لە هەولێر. ئەو باسی گرنگیی کەرتی تەندروستی و بەرەوپێشبردنی لە داهاتوودا کرد. 

سەرۆک بارزانی گوتی، هیوادارم هەولێر و هەموو شارەکانی دیکە ئەوەندە لە رووی تەندروستییەوە پێش بکەون، هیچ کەس پێویستی نەبێت بچێت بۆ وڵاتانی دیکە بۆ چارەسەر. من باوەڕم وایە پزیشکەکانی ئێمە ئەو توانایەیان هەیە. 

 

 

 

دەقی قسەکانی سەرۆک بارزانی:

بە ناوی خودای گەورە و میهرەبان. 
بەڕێزان هەمووتان بەخێربێن، سەر سەر و سەر چاوان.

 

زۆر خۆشحاڵم ئەمڕۆ بەشدارم لەم کۆنگرەیەدا و لە خزمەتی ئێوەدام. دەستخۆشیتان لێدەکەم و داوای سەرکەوتنتان بۆ دەکەم. گرنگیی ئەم کۆنگرەیە یەکجار زۆرە و هەبوونی ئەو هەموو پزیشک و زانایە سەرمایەیەکی گەورەیە بۆ نەتەوەی کورد و دەرخەری ئەوەیە کە ئەگەر تاکی کورد دەرفەتی هەبێت، هیچ کەمتر نییە لە تاکی خەڵکی دیکە. کاتێک دەبیستین کوڕێکی کورد لە وڵاتێکی دەرەوە، وەکو پزیشکێک گەیشتووەتە ئاستێک و ناوبانگی دەرکردووە، ئێمە لێرە شانازی پێوە دەکەین و هەست بە سەربەرزی دەکەین.

 

بەخۆشحاڵییەوە زۆر لەو رۆڵانەی لێرە دانیشتوون، ناوبانگێکی زۆر زۆر باشیان دەرکردووە و توانیویانە بە دەستە زێڕینەکانی خۆیان، خزمەتێکی زۆری هەم مرۆڤایەتی بکەن و هەم ناوی کوردیش بەرز بکەنەوە.

بێگومان کەرتی تەندروستی زۆر گرنگە بۆ هەموو نەتەوە و وڵاتێک، لە ساڵانی رابردوو گەرنگییەکی زۆر بە کەرتی تەندروستی دراوە، بەڵام لەمەودواش هیوادارین بایەخی زیاتری پێ بدرێت، و تەمەننا دەکەم، هەولێر و هەموو شارەکانی دیکەی کوردستان وایان لێبێت، خەڵکەکە ناچاری ئەوە نەبن بچن لە دەرەوە چارەسەر وەربگرن، بەڵکو هەموو پێویستییەک لێرە دابین بکرێت، بۆ ئەوەی خەڵکی ئێمە تووشی ئەو خەرجی و زەحمەتە زۆرە نەبێت، بەڵکو لێرە چارەسەری نەخۆشییەکانیان وەربگرن. من پێموایە، پزیشکانی ئێمە ئەو تواناییەیان هەیە و دەتوانن؛ پێویستە ئەو ئامێرە نوێیانەی کە لە رووی پزیشکییەوە دەرچوونە، هەمووی دابین بکرێن و خەڵکی ئێمە ناچاری چوونە دەرەوە نەبن بۆ چارەسەرکردن.

 

بەڕێزان هەمووتان بیستان کە چەند رۆژ لەمەوپێش هەڵبژاردنێکی مێژوویی کرا لە رۆژی 20ـی مانگ، ئەوەی ئێمە شانازی پێوە دەکەین ئەوەیە کە هەڵبژاردن لە کەشوهەوایەکی زۆر ئارام و ئازاددا ئەنجام درا،  هیچ گرفتێکی ئەوتۆ رووینەدا کە زۆر کەس بۆچوونی وا بوو گرفتی گەورە روودەدات و تەنانەت دەبێتە هۆی ئەوەی کە هەڵبژاردن نەکرێت.
بێگومان وشەکانی بەر لە هەڵبژاردن و دوای هەڵبژاردنی زۆر لایەن وەکو یەک نەبوو، بەڵام ئێستا هەڵبژاردن کراوە و ئەنجامەکانیش راگەیێندراون، ئێستا کاتی ئەوەیە گفتوگۆ بکرێت لە نێوان هەموو لایەنەکان و پێوەریش شایستەی هەلبژاردن بێت، بەڵام ئەوەی لە هەمووی گرنگترە، ئەوەیە کە حکومەتی داهاتوو و دۆخی داهاتووی هەرێمی کوردستان  دەبێ لەسەر ئەم بنەمایانە بن. یەک هەرێم یەک پەرلەمان یەک حکومەت و یەک هێزی پێشمەرگە. 

هەروەها بە جدی رێگری بکرێت لەو کارە نایاساییانەی کە دەکران، وەکو دروستکردنی کارگەی مادەی هۆشبەر یان بازرگانیکردن بە مادەی هۆشبەر یان تیرۆر یان لادان لە یاسا، دەبێ سنوورێک بۆ ئەم شتانە دابنرێت. دەبێ یاسا سەروەر بێت.

حکومەتی داهاتوو، هەر چەندە لە کابینەی نۆیەم و پێشووتریش هەموو هەوڵێکیان داوە کە خزمەتگوزاریی باشتر پێشکێش بە وڵاتەکە بکەن، بەڵام ساڵ بە ساڵ هەم ئەزموونەکە زیاتر دەبێت و هەم ئیمکاناتیش زیاتر دەبێت. 

پێموایە کاتی ئەوە هاتووە کە بیر لە پلانی ستراتیژی بکرێتەوە و سەرووی هەمووی ئەوانەش، دەبێ کەرتی تەندروستی بگاتە ئاستێکی زۆر بەرز؛ هەروەها پەروەردە، کشتوکاڵ، گەشتوگوزار. دەبێ بەرەو ئەوە بچین، متمانە بە خۆمان بکەین. بەڵێ نەوت گرنگە، بەڵام ئەمڕۆ یان سبەی تەواو دەبێت، لەکاتێکدا کشتوکاڵ و گەشتوگوزار لە رووی ئابوورییەوە تەواو نابێت. من وای دەبینم لە داهاتوویەکی نازانم چەند دوور و نزیک، بەڵام کێشەی ئاو دەبێتە کێشەی سەرەکی و لە قورئانی پیرۆزیشدا هاتووە (و جعلنا ماء کل شئ حی). ژیان سەختیی دەبێت بەڵام دەتوانین بەبێ کارەبا بژین، دەتوانین بەبێ ئۆتۆمبێل بژین، بەڵام بەبێ ئاو ناتوانین بژین. 

دەستخۆشی لە حکومەتی هەرێمی کوردستان دەکەم کە لەم دواییانەدا بایەخێکی زۆری بە بەنداو داوە، بەڵام لەمەودوا دەبێ ئەمە یەکێک بێت لە کارە لەپێشینەکانی حکومەتی هەرێمی کوردستان، چونکە پرسی ئاو بە هیچ شێوەیەک کەمتەرخەمی قبووڵ ناکات. ئینشائەڵڵا تووشی ئەو قەیرانە نەبین، بەڵام هەموو ئاماژەکان بەرەو ئەوە دەچن کە لە داهاتوودا پرسی ئاو دەبێتە کێشەیەکی زۆر گەورە.

 

هەروەها ئامانج ئەوەیە کە چارەسەری هەموو گرفتەکان لەگەڵ بەغداش بەپێی دەستوور و بەپێی ئەو رێککەوتنانەی کە هەیە بکرێت. ئەوەی کە جێگەی دڵخۆشییە بۆ ئێمە، لەم دواییانەدا بیستمان کە دەستپێشخەرییەک هەیە بۆ پڕۆسەی ئاشتی لە تورکیا، هیوادارین سەر بگرێت و هیچ کەس کۆسپی بۆ دروست نەکات. هەموو کەس دەتوانێت قسە بکات بەڵام گرنگ کردوەیەوە. (لێرە رستەیەکی عەرەبی دەڵێت) جارێکی دیکە بەخێرهاتنی هەمووتان دەکەم و تەمەننای سەرکەوتنتان بۆ دەکەم، ئەرکی ئێوە ئەرکێکی پیرۆزە و ئێوە جێگەیەکی تایبەتتان هەیە لە دڵی میللەتدا، چونکە ئێوە خزمەتی مرۆڤایەتی دەکەن، دەستەکانی ئێوە پیرۆزن و دەستتان خۆش بێت.