بەشێکی زۆر لەو پۆلیسە عەرەبانەی لە کەرکووک دامەزرێندراون خەڵکی شارەکە نین

 

لە کۆی ئەو 838 پۆلیسە، تەنیا 143 پۆلیسیان کوردن، 72ـی تورکمان و یەک پۆلیسی مەسیحی تێدایە، ئەوەی دیکە کە 622 دەمێنێتەوە، لە نەتەوەی عەرەبن. 

 

بڕیارە دوو قۆناخی دیکە لە ماوەکانی داهاتوودا مەشق و راهێنان بکەن و دەستبەکاربن، فەرماندەی پۆلیسی کەرکووک دەڵێت، "لە هەوڵدان هاوسەنگی لە قۆناخەکانی داهاتوودا پەیڕەو بکرێت."

 

لیوا کاوە غەریب، فەرماندەی پۆلیسی کەرکووک لە دوای تەواوبوونی رێوڕەسمەکە قسەی بۆ رووداو کرد، رایگەیاند، "هەوڵمانداوە لە قۆناخی سێیەم هاوسەنگیی نیشتمانی لەنێو ئەو 2500 پۆلیسەدا هەبێت، ئەگەر 10 لە لایەک کەم بێت یان زیادبێت کێشە نابێت، بەڵام نابێت زۆر ناهاوسەنگ بێت."

 

بەپێی زانیارییەکانی تۆڕی میدیایی رووداو، لە قۆناخەکانی دیکەدا کۆی پشکی کورد 332 پۆلیس و تورکمان 272 پۆلیس و عەرەب 1088پۆلیس دەبێت. جیا لەوە بەشێکی زۆری ئەوانەی وەرگیراون خەڵکی پارێزگاکانی دیکەی عێراقن و لەلایەن ئیدارەی پارێزگاوە بەڵگەنامەی نیشتەجێبونی کەرکووکیان بۆکراوە.

 

نوێنەری وەزیری ناوخۆ لە وەڵامی رووداودا نەیشاردەوە خەڵکی ناوچەکانی دیکە وەرگیراون، بەڵام بیانووەکەی ئەوەبووە گوایە بەڵگەنامەی کەرکووکیان هەبووە یان لە رابردوودا هاوردەی کەرکووک کراون. 

 

فەریق هادی زرەیج، نوێنەری وەزیری ناوخۆ دەڵێت، "ئەوە وەرگرتن نییە لە پارێزگاکانی دیکەوە، ئەوە قەدەرە بەسەر ئەو هاووڵاتییە هاتووە لە نەتەوەکانی دیکە، لەدایکبوونی کەرکووکە یا ساڵانێکی زۆر لە کەرکووک ژیاوە، ئێستا لە پارێزگایەکی وەک سەلاحەدین یان موسڵە، بەڵام ئەوە نەوەی کەرکووکە و لەدایکبووی کەرکووکە."

 

دامەزراندنی ئەو ژمارە پۆلیسە بە گرێبەست بۆ ئەو مەبەستەیە کەلێن و بۆشاییەکانی دەزگا ئەمنییەکانی پێ پڕبکرێتەوە کە ساڵانێکی زۆرە دامەزراندن لەو بوارەدا نەکراوە. هەر پۆلیسێک بە گرێبەستی 3 ساڵ و مووچەی مانگانەی 500 هەزار دینار دەوام دەکەن، لە داهاتووشدا چانسی ئەوەیان هەیە ببنە هەمیشەیی.