هەڵەیەک روویدا! دووبارە هەوڵبدە
کاتی بەخسپاردنی رووفاتی ئەو پێشمەرگەیە لە گۆڕستانی شاخکێ
رووداو دیجیتاڵ
رووفاتی پێشمەرگەیەک کە پێش 45 ساڵ شەهید بووە، لە گوندی دۆستەکی سنووری ناحیەی دینارتە لە چاڵێکدا دۆزرایەوە و لە گۆڕستانی شاخکێ بەخاک سپێردرا. حەسەن سوبحی دەزگیراندار بووە و لەکاتی دۆزینەوەی رووفاتەکەیدا، شووشەیەک عەتر، دەسماڵێک و شانەیەکی دەزگیرانەکەی لە گیرفانی دا بووە.
مستەفا مزووری، پێشمەرگەی دێرین لەگەڵ حەسەن بووە کاتێک شەهید بووە و بە رووداوی گوت، "ئێمە سێ پێشمەرگە بووین، لەگەڵ هاوڕێیەکم لە پەنای بەردێک دامان نا و پێمگوت، ئەگەر دەنگی ژن و منداڵ هات، قسە بکە بەڵکو هاوکاریت بکەن، ئەگەر دەنگی عەرەب هات، قسە مەکە. گوتم ئێمە دەچین و هاوڕێی زیاتر دەهێنین تاوەکو هاوکاریت بکەین."
کەسوکاری شەهید حەسەن، هیچ وێنەیەکی ئەو پێشمەرگەیەیان نییە. چیرۆکی ئاشکرابوونی شوێنی شەهیدبوونی دوای ئەوە هات کە هاوڕێیەکی دوو کتێبی چاپکردووە و باسی چیرۆکی حەسەنیشی تێدا کردووە.
رزگار کێستەیی، کەسوکاری حەسەن دەڵێت، "نزیکەی دوو مانگە دەستمان بە لێکۆڵینەوە و بەدواداچوون کردووە تاوەکو زانیمان شوێنەکەی کوێیە، پێشتر نەماندەزانی رووفاتەکەی لەکوێیە."
حەسەن تاقانەی حەوت خوشک بوو. دەزگیراندار بووە و بەنیازبووە دوای گەڕانەوەی لە ئەرکەکەی، ئاهەنگی گواستنەوەی خۆشەویستەکەی رێکبخات. خوشکێکی دەڵێت، "هەموو ئامادەکارییەکمان کردبوو بۆ ئاهەنگەکەی، دایک و باوکم جلوبەرگیان کڕی بوو، هەواڵمان بۆ هات کە هێرش دێت، بە حەسەنیان گوت مەڕۆ تۆ لە مۆڵەتی، بەڵام گوتی 'نەخێر ناتوانم هەموو پێشمەرگەکان بڕۆن و من نەڕۆم'."
لەنێو جلوبەرگی حەسەنی 21 ساڵدا، شووشەیەک عەتر، شانەیەک و دەسماڵێکی دەزگیرانەکەی دۆزراوەتەوە. برایەکی حەسەن کە چوار ساڵ دوای شەهیدبوونی خۆی لەدایکبووە، ئێستا لەگەڵ شەش خوشکی دەژین، بەڵام ئەوان هیچ وێنەیەکی حەسەنیان نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ