چەند گەنجێک دەچنە سەر ئۆفیسی ئێن ئاڕ تی لە دهۆک
رووداو- دهۆک
دوای ئەوەی چەند گەنجێک دەچنە سەر ئۆفیسی ئێن ئاڕ تی لە دهۆک ، سەنتەری میترۆ بە هەنگاوێكی مەترسیداری دادەنێت و پۆلیسی دهۆکیش رایدەگەیێنێت: "چه‌ند گەنجێکی دهۆکی بەشێوه‌یه‌کی هێمنانە چووبوونە نیو ئۆفیسەکە و داوایانکردووە ئێن ئاڕ تی بانگەشە بۆ نەخێر بووەستێنێت".
رۆژی پێنجشەممە 31-8-2017 چەند گەنجێک لە دهۆک چوونەسەر ئۆفیسی ئێن ئاڕ تی ، بەپێی ئەو کەناڵە "ویستوویانە نووسینگەی ئێن ئاڕ تی لە دهۆک دابخەن و تابلۆی ئێن ئاڕ تی دابگرن، بەڵام دواتر هێزە ئەمنییەکانی دهۆک گەیشتوونەتە ئۆفیسەکە و دۆخەکەیان کۆنترۆڵکردووە".
لە کاردانەوەی رووداوەکەدا سەنتەری میترۆ ئیدانەی ئەو کردەوەیەی کردووە و داوا دەكات "ململانێی سیاسی لە قۆناخی بڕیاری ئەنجامدانی گشتپرسی نەكرێتە پاساو بۆ پێشێلكردنی ئازادی رادەربڕین و ئازادی رۆژنامەنووسی".
سەنتەری میترۆ هەروەها رایدەگەیێنێت: "ئەم هێرشە هاندانی تووندوتیژییە بەرامبەر دەنگی (نەخێر) و رێگەش خۆش دەكات بۆ تێكدانی ئاشتی كۆمەڵایەتی".
لە بەرامبەردا هێمن سلێمان، گوته‌بێژی پولیسی دهۆک بە تۆڕی میدیایی رووداوی راگەیاند: "لەکاتی ئاگادارکردنەوەی پۆلیس هێزه‌کانمان لە ئوفیسی ئێن ئاڕ تی ئامادەبوون و ئەو گەنجانە دەرکران بەبێ ئه‌وەی هیچ زیانێکی گیانی و ماددی بە ئۆفیسەکە کەوتبێت".
هێمن سلێمان گوتی: "ئێستا رەوشەکە ئاسایی بووەتەوە و کارمه‌ندانی ئەوان کاری ئاسایی خۆیان دەکەن، چه‌ند پولیسێکش لە بەردەرگای ئوفیسەکە ماون تاوەکو ئەو گرژیە تەواودەبێت".
سەبارەت بە هۆکاری رووداوەکە گوته‌بێژی پولیسی دهۆک گوتی: "ئەوانەی چوونەتە سەر ئۆفیسەکە چەند گەنجێک بوون کە تووڕەبوون لەوەی بەگوتەی ئەوان ئێن ئاڕ تی بانگەشە بۆ نەخێر دەکات لە گشتپرسی و داوایانکردووە ئەو هەڵمەتە رابگرن".
داڕشتنەوە؛ عومەر شایان