لە ورمێ دەست بەسەر 179 پارچە دراوی کۆندا گیرا
رووداو دیجیتاڵ
لە پارێزگای ورمێی رۆژهەڵاتی کوردستان، دەست بەسەر 179 پارچە دراوی کۆندا گیرا کە مێژوویان بۆ دوو هەزار ساڵ پێش ئێستا و سەردەمی دەسەڵاتی یۆنانییەکان لە ئێران دەگەڕێتەوە.
ناسر عەتەباتی، سەرۆکی دەسەڵاتی دادوەریی پارێزگای ورمێ، رۆژی پێنجشەممە رایگەیاند، دوای ئەوەی زانیارییان پێگەیشت ژمارەیەک کەس بە شێوەیەکی نایاسایی کڕین و فڕۆشتن بە هەندێک شوێنەوار دەکەن، دەستیان بە لێکۆڵینەوە کرد.
ناسر عەتەباتی گوتی، دوای بەدواداچوون و پشتڕاستکردنەوەی زانیارییەکان، هێزە ئەمنییەکان بە هاوئاهەنگی لەگەڵ دەسەڵاتی دادوەریی، ئۆپەراسیۆنێکیان کرد و دەستیان بەسەر 179 پارچە دراوی کۆندا گرت، کە پێکدین لە سکەی زێر و مس و مێژووەکەیان بۆ دوو هەزار ساڵ پێش ئێستا دەگەڕێتەوە.
بە گوتەی ناسر عەتەباتی لە ئۆپەراسیۆنەکەدا چەند کەس لەلایەن هێزە ئەمنییەکانەوە بە تۆمەتی کڕین و فرۆشتنی شوێنەوار بە شێوەیەکی نایاسایی دەستگیرکران، دوای لێکۆڵینەوە سەرەتاییەکان، رادەستی دەسەڵاتی دادوەریی کران و بە بڕیاری دادگە رەوانەی گرتووخانە کران.