رووداو دیجیتاڵ
لە رووهای باکووری کوردستان چەند کەسێکی نەناسراو دەستڕێژی گولـلەیان کردە سەر دوو برا و کوشتیانن. هێزەکانی پۆلیس بۆ دۆزینەوەی بکوژەکان لێکۆڵینەوەیان دەستپێکرد.
رووداوەکە ئێوارەی ئەمڕۆ دووشەممە 31ـی ئاداری 2025 لە گەڕەکی کاراکۆیونلو لە شارۆچکەی ئەیووبییە لە رووهای باکووری کوردستان روویداوە.
بەڕێوەبەرایەتیی پۆلیسی رووها رایگەیاند، یوسف ئایدۆغدو تەمەن 32 ساڵ و یەعقوب ئایدۆغدو تەمەن 29 ساڵ، لە شەقامی پێشانگاکان دوای لە کار گەڕانەوەیاندا، لەلایەن چەند کەسێکی نەناسراو بە سواری ماتۆرسکیل بە دەستڕێژی گولـلە بە سەختی بریندار کران.
بەگوێرەی راگەیێندراوەکە، هەر دوو براکە دوای گواستنەوەیان بۆ نەخۆشخانەی گشتیی بینگۆل لە شارۆچکەکەدا، سەرباری هەوڵی پزیشکەکان، گیانیان لەدەستدا.
پۆلیسی شارۆچکەی ئەیووبییە دەستیان بە لێکۆڵینەوە کردووە و هەوڵەکان بەردەوامن بۆ دۆزینەوەی بکوژەکان.
بە گوێرەی ئامارە نافەرمییەکان، ساڵی رابردوو سێ هەزار و 773 تاوانی کوشتن لە تورکیا و باکووری کوردستان بە چەک ئەنجامدراون، کە تێیاندا دوو هەزار و 318 کەس کوژراون و سێ هەزار و 820 کەسی دیکە بریندار بوون.
ئامارە نافەرمییەکان باس لەوە دەکەن، لە سەرانسەری تورکیادا چوار ملیۆن چەکی مۆڵەتدراو و 36 ملیۆن چەکی بێ مۆڵەت هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ