رووداو دیجیتاڵ
لە پارێزگاکانی وان، قەرس و دێرسم لە باکووری کوردستان بەفر دەبارێت. پلەی گەرما بەشێوەیەکی بەرچاو دابەزیوە.
بەیانیی ئەمڕۆ دووشەممە 31ـی ئاداری 2025، بەفر لە ناوچە شاخاوییەکانی هەر سێ پارێزگای وان، قەرس و دێرسم لە باکووری کوردستان باری. لە پاڵ بەفر بارینەکە، با و بۆران هەڵیکرد و پلەی گەرما بەشێوەیەکی بەرچاو دابەزی.
بەگوێرەی زانیارییەکانی بەڕێوەبەرایەتیی گشتیی کەشناسی تورکیا، پلەی گەرما بە کاتی رۆژ لە پارێزگای وان 3 پلەی سلیزییە و بە کاتی شەو بۆ 1 پلەی ژێر سفری سیلیزی دادەبەزێت. خێرایی با لەم پارێزگایە 65-80 کم دەبێت لە کاژێرێکدا.
لە پارێزگای قەرس بە رۆژ 2 پلەی سیلیزی و بە شەو 1 پلەی ژێر سفر و لە پارێزگای دێرسم بە کاتی رۆژ پلەی گەرما 5 پلە و بە شەو 2 پلەی سیلیزییە.
پێشبینی دەکرێت لە کاتی شەودا بەهۆی بەفربارینەکەوە سەرماوسۆڵە روو لە هەر سێ پارێزگاکە بکات و گژوگیا و درەختەکانی ناوچەکە زوقم بگرن.
بەڕێوەبەرایەتییەکە پێشبینی دەکات، بەفر بارینەکە لە هەر سێ پارێزگاکە بەرەبەیانی سبەی 1ـی نیسان کۆتایی پێ بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ