پسووڵەکانی دەنگدان لە ئامەد بە هێلیکۆپتەری سەربازی گوێزرانەوە

 

 

کاژێر 07:00ی بەیانیی ئەمڕۆ یەکشەممە 31ی ئاداری 2024 لە پارێزگای ئامەد، دەنگدان بۆ هەڵبژاردنی شارەوانییەکان دەستیپێکرد و تاوەکو کاژێر 16:00 بەردەوام دەبێت.

 

بەرپرسانی بنکەکانی دەنگدان و پسووڵەکانی دەنگدان بە هێلیکۆپتەری سەربازی بۆ هەندێک شوێنی نیشتەجێبوونی ناوچە گوندنشینەکان گوێزرانەوە.

 

دەم پارتی دوو کەسی بۆ پۆستی سەرۆکی شارەوانیی ئامەد بەربژێر کردووە و ئامانجییەتی ئەو شارەوانییە وەربگرێتەوە، ئەوەش دوای ئەوەی لە هەڵبژاردنی رابردوودا بردییەوە، بەڵام دواتر قەییومی بۆ دانرا. دوو بەربژێرەکەی بریتین لە سەرا بوجاک و دۆغان هاتوون.

 

هەرچی ئاکپارتییە بە بەربژێرکردنی محەممەد هالیس بیلدەن لە رکابەرایەتییەکاندایە و جەهەپەش جەعفەر پێکدەمیری بەربژێر کردووە.

 

هەر لە ئامەد چەندین پارتی دیکە هەن کە ئەندام و لایەنگریان هەیە. فارووق دینچ بەربژێری هوداپار و محەممەدشاه ئەرەنیش بەربژێری هاکپارە.

 

راپرسییەکان دەریدەخەن کە دەم پارتی زیاتر لە 50%ی دەنگەکان؛ ئاکپارتی نزیکەی 30%؛ هوداپار نزیکەی 5%ی دەنگەکان؛ جەهەپە نزیکەی 2%ی دەنگەکان دەبەنەوە. هاکپاریش نزیکەی 1%ی دەنگەکان بەدەستدەهێنێت.