وێنەی هێلیکۆپتەرێک لەکاتی گواستنەوەی پسووڵەکانی دەنگدان لە ئامەد. وێنە: AA
رووداو دیجیتاڵ
لە پارێزگای ئامەدی باکووری کوردستان بە هێلیکۆپتەری سەربازیی سەر بە فەرماندەیی جەندرمەی ئامەد، پسووڵەکانی دەنگدان بۆ هەندێک شوێنی نیشتەجێبوونی ناوچە گوندنشینەکان گوێزرانەوە.
کاژێر 07:00ی بەیانیی ئەمڕۆ یەکشەممە 31ی ئاداری 2024 لە پارێزگای ئامەد، دەنگدان بۆ هەڵبژاردنی شارەوانییەکان دەستیپێکرد و تاوەکو کاژێر 16:00 بەردەوام دەبێت.
بەرپرسانی بنکەکانی دەنگدان و پسووڵەکانی دەنگدان بە هێلیکۆپتەری سەربازی بۆ هەندێک شوێنی نیشتەجێبوونی ناوچە گوندنشینەکان گوێزرانەوە.
دەم پارتی دوو کەسی بۆ پۆستی سەرۆکی شارەوانیی ئامەد بەربژێر کردووە و ئامانجییەتی ئەو شارەوانییە وەربگرێتەوە، ئەوەش دوای ئەوەی لە هەڵبژاردنی رابردوودا بردییەوە، بەڵام دواتر قەییومی بۆ دانرا. دوو بەربژێرەکەی بریتین لە سەرا بوجاک و دۆغان هاتوون.
هەرچی ئاکپارتییە بە بەربژێرکردنی محەممەد هالیس بیلدەن لە رکابەرایەتییەکاندایە و جەهەپەش جەعفەر پێکدەمیری بەربژێر کردووە.
هەر لە ئامەد چەندین پارتی دیکە هەن کە ئەندام و لایەنگریان هەیە. فارووق دینچ بەربژێری هوداپار و محەممەدشاه ئەرەنیش بەربژێری هاکپارە.
راپرسییەکان دەریدەخەن کە دەم پارتی زیاتر لە 50%ی دەنگەکان؛ ئاکپارتی نزیکەی 30%؛ هوداپار نزیکەی 5%ی دەنگەکان؛ جەهەپە نزیکەی 2%ی دەنگەکان دەبەنەوە. هاکپاریش نزیکەی 1%ی دەنگەکان بەدەستدەهێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ