رووداو دیجیتاڵ
دوای سێ رۆژ، تەرمی ئەو گەنجەی 27ـی کانوونی دووەمی 2025 لە رێگەی چوونی بۆ عومرە، لە سعودیە بە رووداوی هاتووچۆ گیانی لەدەست دا، گەڕێندرایەوە قەزای چەمچەماڵ و بەخاکسپێردرا.
ئەمڕۆ هەینی، 31-01-2025، تەرمی جووتیار عەبدولمەجید عەبدولکەریم (مەلا وەیسی) گەڕێندرایەوە قەزای چەمچەماڵ و لە گۆڕستانی شارۆچکەی تەکیەی سەر بە قەزاکە بەخاکسپێردرا.
رەمک رەمەزان، قایمقامی چەمچەماڵ لە رێوەڕەسمی بەخاکسپاردنەکەدا گوتارێکی پیشکێشکرد و هاوخەمیی خۆی بۆ کەسوکاری گەنجەکە دەربڕی.
رەمک رەمەزان گوتی، ''مرۆڤ هەر دەمرێت، بەڵام گرنگ ئەوەیە چۆن دەمرێت و چۆن دۆست، هەڤاڵەکان و کەسوکاری شانازی پێوە دەکەن.''
ئێوارەی رۆژی دووشەممە 27ـی کانوونی دووەم، پاسێکی عومرەکارانی کورد لە سنووری سعودیە - عێراق و لە کاتی چوونیدا، تووشی رووداوی هاتووچۆ بوو، بەهۆیەوە، "جووتیار مەلا وەیسی گیانی لەدەستدا و 13ی دیکەش بریندار بوون."
پاسەکە لەگەڵ بارهەڵگرێکدا پێکیاندادا. ئەوکات نەبەز ئیسماعیل، گوتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی رووداوی گوت، "دوو سەرنشینی بارهەڵگرەکەش گیانیان لەدەستداوە".
برای ئەو گەنجەی لە رێگەی عومرەکردن لە سعودیە گیانی لەدەستدا: براکەم دوو منداڵی دووانەی لە دوای خۆی جێهێشتوون pic.twitter.com/q6edC8m7bN
— Rudaw (@Rudawkurdish) January 31, 2025
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ