رووداو دیجیتاڵ
ئەمینداری گشتی یەکگرتووی ئیسلامی رایگەیاند لەکاتێکدا بانگەشە دەکەین، کە ناوچەکە و هەرێمی کوردستان لە دۆخێکی ناهەمواردایە و دەبێت ئاگامان لە خۆمان بێت و پارێزگاری لە قەوارەی فیدراڵی هەرێمی کوردستان بکەین.
ئەمڕۆ دووشەممە، 30ی ئەیلوولی 2024، سەلاحەدین بەهائەدین، ئەمینداری گشتی یەکگرتوو لە بانگەشەی هەڵبژاردن و ناساندنی بەربژێرەکانی یەکگرتووی ئیسلامیی کوردستان گوتارێکی پێشکێشکرد و باسی بارودۆخی ناوچەکە و بانگەشەی هەڵبژاردنی کرد.
سەلاحەدین بەهائەدین گوتی: ''ئێمە لەکاتێکدا بانگەشە دەکەین کە ناوچەکە و هەرێمی کوردستان لە دۆخێکی ناهەمواردایە و بە ناوی بانگەشەی هەڵبژاردنەوە سنوورەکانەوە دەبەزێندرێن و لە تام دەردەچێت، ئێمە دەخوازین وەکو یەکگرتوو ئامرازی خێر بین و خوازیاری راستکردنەوەی هەڵەکان بین، بەو هەڵەیەشەوە کە لە بانگەشەی هەڵبژاردن دەکرێت و خەریکە دۆخەکە کە خۆی چەند ناتەواوە، هێندەی دیکە ئاڵۆز دەکرێت''.
سەبارەت بە قەوارەی هەرێمی کوردستان رایگەیاند: ''لە ستراتیژیەتی ئێمەدا جێگیرە وەکو یەکگرتوو، ئەویش پارێزگاریکردن لە قەوارەی هەرێمی کوردستان وەکو قەوارەیەکی فیدراڵی ئەرکە و هێڵی سوورە، شەڕی گەورەی سێیەم لەناوچەکەدا بەڕێوەیە، ئەوە ساڵێکە لە غەززە بەردەوامە و لە لوبنانیش بۆمبارانی کوێرانە دەکرێت و ئەگەری تەشەنەکردن و فراوانبوونی هەیە''.
سەلاحەدین بەهائەدین پەیامێکی ئاراستەی هاووڵاتییان و خەڵک کرد، کە رۆژی 20ی ئۆکتۆبەر دەنگ بدەن و گوتی ''لە جیاتی ئەوەی جنیۆ بدەی و قسەی زیادە و کەم و زۆر و ئەم کافر بکەی و ئەو خائین بکەی، ئالییەتی مەدەنی هەیە و مافی خۆتە و ئەرکیشە و هەر کەسێکت بە دڵە دەنگی پێ بدە''.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ