ئاسایشی هەولێر و لیستی 129ی یەکێتی راگەیێندراو لەبارەی تەقەکەی ناو مزگەوتی رەشاد موفتی بڵاو دەکەنەوە

 

 

ئەمڕۆ دووشەممە، 30ی ئەیلوولی 2024 ، کاتێک شاڵاو کۆسرەت رەسوول دەچێتە پرسەیەک لە مزگەوتی رەشاد موفتی، گرژی روودەدات و شەڕە تەقەی بەدوادا دێت و کەسێک لە بنەماڵەی خاوەن پرسە بریندار دەبێت.

 

پرسەکە هی ماڵی خزمێکی قەهاری سابیر عەلکەیە، کە لە کاتی شەڕی ناوخۆدا باوک و مامێکی قەهار لە شەڕی ناوخۆدا لە هەولێر کوژراون، گوتەبێژی لیستی یەکێتی دەڵێت ماڵی کۆچکردوو خێزانێکی یەکێتین بۆیە شاڵاو کۆسرەت چووەتە پرسەکە.

 

ئاسایشی هەولێر لە راگەێیندراوێکدا دەڵێ: "(شاڵاوی کۆسرەت رەسوول) بەبێ ئاگادارکردنەوەی پێشوەختەی ئەو بنەماڵەیە سەردانی پرسەکەیانی کردووە، لەلایەن بنەماڵەی خاوەن پرسەکە پێیان گوتراوە کە پرسەکە بەجێبهڵێت و رەزامەندنەبوون لەسەر سەردانەکەی، چونکە لە رابردوو دا دوو کەسی خاوەن پرسەکە بەدەستی بنەماڵەی شاڵاو شەهید کراون، بەم هۆیەوە دەبێتە دەمەقاڵەیان".

 

ئاسایشی هەولێر هەروەها دەڵێت: "پاسەوانەکانی شاڵاو بەبێ گوێدانە هیچ رێزێک بۆ حەرەمی مزگەوت و خاوەنی پرسەکە هێرشیان کردووەتە سەر خاوەنی پرسەکە و تەقەیەکی زۆریان کردووە. لە ئەنجامدا هاووڵاتییەک بە گوللەی پاسەوانەکانی شاڵاو بریندار کراوە، لێرەوە دووپاتی دەکەینەوە یاسا سەروەرە و ئەو کەسانەی تەقەیان کردووە و لەم کارە نایاساییە بەشداربوونە رووبەڕووی یاسا دەکرێنەوە".

 

لە بەرامبەردا گوتەبێژی لیستی 129ی یەکێتی نیشتمانی کوردستان لە راگەیێندراوێکدا دەڵێت: "پاسەوانەکانی قەهار، لەکاتی جێهێشتنی مزگەوت لەلایەن شاڵاو کۆسرەت رەسووڵ، لە ناو مزگەوتەکەدا تەقە دەکەن".

 

هەروەها لە راگەیێندراوەکە دا هاتووە: "لەکاتی بەشداریکردنی شاڵاو کۆسرەت رەسوول لە پرسەی کۆچکردوو (تۆفیق حاجی حەمەکە) کە خانەوادەیەکی یەکێتین، کوڕێکی ( قەهاری سابیر عەلکە) لەناو مزگەوت قسەی نەشیاو دەکات، لە بەرامبەردا، لەپای رێزگرتن لە حەرەمی مزگەوت و نەریتی کۆمەڵایەتی و ئایینی میللەتەکەمان و خانەوادەی کۆچکردوو، شاڵاو کۆسرەت رەسوول وەڵامی ناداتەوە". هەروەها هاتووە " پاشان، پاسەوانەکانی قەهار، لەکاتی جێهێشتنی مزگەوت لەلایەن شاڵاو کۆسرەت رەسوول، لە ناو مزگەوتەکەدا تەقە دەکەن".