کەسوکاری قوربانییەکان لە مزگەوت و لەسەر گۆڕی دایک و کچەکە لە قەڵادزێ
رووداو دیجیتاڵ
دوای نیوەڕۆی دوێنێ هەینی لە گەڕەکی کوردساتی سلێمانی گەنجێکی 18 ساڵ خۆی لە سێ کەس دا و بەهۆیەوە دایک و کچێک گیانیان لەدەستدا. گوتەبێژی هاتووچۆی سلێمانی بە رووداوی گوت، شۆفێرەکە مۆڵەتی نەبووە.
کارمەند عەلی، کەسوکاری قوربانییەکان بە تۆڕی میدیایی رووداوی گوت، "خوشکم و دایکم لە ماڵی براکەم بوون لە سلێمانی، لە گەڕەکی کوردسات بۆ شتکڕین بە پیادە چوون، لەسەر شۆستەکە ئۆتۆمبێلێک بەهۆی تیژڕۆییەوە لێی داون، بە قەزا و قەدەری خودا رازین."
رووداوەکە بەم جۆرە بووە: ئۆتۆمبێلێک کە شۆفێرەکەی گەنجێکی تەمەن 18ساڵە و مۆڵەتی شۆفێری نییە، کۆنترۆڵی لەدەست داوە و خۆی کێشاوە بە سێ پیادەڕۆدا، خەدیجە محەممەدی تەمەن 55 ساڵ و بێریتان عەلیی کچی کە تەمەنی 29 ساڵ بوو، لە شوێنی رووداوەکە گیانیان لەدەستداوە و شۆفێرەکە و کەسێکی دیکەیش بریندارن.
ئەو دایک و ژنە خەڵكی قەڵادزێ بوون لە سنووری ئیدارەی سەربەخۆی راپەڕین و هەر لە زێدی خۆیان بەخاک سپێردران.
ئارام ئەحمەد، کەسوکاری دایک و کچەکە باسی لەوە کرد، "بۆ هەواگۆڕکێ و تەندروستیی خۆی، پوورم و کچەکەی ویستوویانە سەردانی بازاڕ بکەن، ئۆتۆمبێلێکی جێب لەوێ هەردووکیانی شێلاوە و گیانیان لەدەستداوە. چەند کەسێکی دیکەش بریندار بوون."
لە کەمتر لە 24 کاژێری رابردوودا بەهۆی رووداوەکانی هاتووچۆوە تەنیا لە پارێزگای سلێمانی، دوو کەس گیانیان لەدەستدا و زیاتر لە 20 کەسی دیکەش بریندار بوون. ئەمە بەگوێرەی بەڕێوەبەرایەتیی هاتووچۆی سلێمانی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ