سەرۆکی حکومەتی هەرێمی کوردستان لەبارەی هێرشەکانی ئەمشەوی هەولێر رایگەیاند، بە تووندی ئیدانەی هێرشەکە دەکات و دەشڵێت "حکومەتی هەرێمی کوردستان هیچ جۆرە هەوڵێک بۆ تێکدانی سەقامگیریی کوردستان قبووڵ ناکات و وەڵامیشمان بۆی زۆر تووند دەبێت".

 

مەسرور بارزانی، سەرۆکی حکومەتی هەرێمی کوردستان ئاماژەی بەوەش کردووە، لەگەڵ مستەفا کازمی، سەرۆکوەزیرانی عێراق قسەی کردووە لەبارەی هێرشەکەوە و پێی گوتووە "دەبێت ئەنجامدەرانی سزابدرێن".

 

 

گوتەبێژی هاوپەیمانیی نێودەوڵەتیی دژی داعش رایگەیاند، مووشەکەکانی ئەمشەو لە هەولێر لەناو بنکەکانیان نەکەوتوونەتەخوارەوە.

 

وەین مەراتۆ، گوتەبێژی هاوپەیمانیی نێودەوڵەتیی دژی داعش لە تویتێکدا لەبارەی هێرشەکەی ئەمشەوی هەولێر رایگەیاندووە "راپۆرتە سەرەتاییەکان ئاماژە بەوە دەکەن کە هێرشی ناڕاستەوخۆی ئەمشەو لە هەولێر لەناو بنکەی هێزەکانی هاوپەیمانان نەکەوتووەتەخوارەوە. هیچ زیانێکی گیانی و ماددی نەکەوتووەتە و لێکۆڵینەوە لە رووداوەکە بەردەوامە".

 

هێرشی ناڕاستەوخۆ مەبەست لە هێرشی مووشەکییە لە شوێنێکی دوورەوە.

 

 

لە راگەیێندراوەکەی وەزارەتی ناوخۆدا هاتووە، کاژێر 8:30 ی ئەم ئێوارەیە، شەش مووشەک بە ئاراستەی فڕۆکەخانەی نێودەوڵەتی هەولێر هاوێژران کە خۆشبەختانە هیچ ئامانجێکیان نەپێکاوە و هیچ زیانێکی لێ نەکەوتووەتەوە. 

 

لە راگەیێندراوەکەدا هاتووە، مووشەکەکان لە سنووری ( برطلە) لە نێوان گوندەکانی شیخ ئەمیر و تەرجلە لە سەر پیکابێک هاوێژراون. ئەم دەڤەرەش دەکەوێتە سنووری لیوای 30 حەشدی شەعبی. "تیمە تایبەتەکانی ئێمە خەریکی لێکۆڵینەوەی وردن بۆ بە دەستهێنانی زانیاری زیاتر".

 

وەزارەتی ناوخۆ رایدەگەیێنێت "لەکاتێکدا بە تووندترین شێوە ئەم هێرشە تێرۆریستییە ترسنۆکانەیە ئیدانە دەکەین، لە هەمانکاتدا ئامادەیی تەواومان هەیە بۆ بەرپەرچدانەوەی هەر دەستدرێژیەک. داواش لە حکومەتی فیدراڵی دەکەین دەستبەجێ  ئیجرائاتی پێویست وەربگرن".

 

ده‌زگا ئه‌منييه‌كانى هه‌رێمى كوردستان وێنه‌ى ئه‌و ئۆتۆمبێله‌يان ده‌ستكه‌وت كه‌ وەک دژەتیرۆری کوردستان دەڵێت، له‌لايه‌ن "ميليشياكانى حه‌شدى شه‌عبييه‌وه" بۆ به‌ ئامانجگرتنى فڕۆكه‌خانه‌ى هه‌ولێر به‌كارهاتووه‌.

لەبارەی هێرشە مووشەکییەکەوە دژەتیرۆری هەرێمی کوردستان رایگەیاند، شه‌ش مووشه‌ك له‌ ده‌ره‌وه‌ى سنوورى هه‌ولێر ئاراسته‌ى فڕۆكه‌خانه‌ى هه‌ولێر كران به‌ڵام هيچ زيانێكى لێنه‌كه‌وته‌وه‌.

دژەتیرۆری هەرێمی کوردستان وردەکاریی هێرشە مووشەکییەکە دەخاتەڕوو و رایدەگەیێنێت؛ "كاژێر 20:30ى ئه‌مشه‌و له‌ سنوورى گوندى شێخ ئه‌ميره‌وه‌ كه‌ سه‌ر به‌ پارێزگاى نه‌ينه‌وايه‌ له‌لايه‌ن ميليشياكانى حه‌شدى شه‌عبييه‌وه‌ 6 مووشه‌ك به‌ ئاراسته‌ى فڕۆكه‌خانەی نێوده‌وڵه‌تى هه‌ولێر هاوێژران، به‌ڵام دوور له‌ فڕۆكه‌خانه‌ له‌ چۆڵه‌وانى كه‌وتنه‌ خواره‌وه‌ و دوو له‌و مووشه‌كانه‌ش نه‌ته‌قيونه‌ته‌وه‌ و خۆشبه‌ختانه‌ هيچ زيانێكى لێ نه‌كه‌وته‌وه"‌.