وردەکاریی کۆبوونەوەی پارتی و یەکێتی؛ "گفتوگۆکان بەردەوام دەبن"

 

چاوەکان لەسەر کۆبوونەوەکە بوو، هاونیشتمانییان بە تامەزرۆییەوە لە شاشەی رووداویان دەڕوانی تاوەکو ئەنجامێکی ئەرێنی ببینن. 

 

محەممەد عەبدولقادر، دووکاندارێکە و دەڵێت: ناکۆکی نێوان ئەوان دڵەراوکێیە بۆ خەڵک بەهیوام ئەم کۆبوونەوەیە ببێتە هەوێنی ئاشتاوایی نێوانیان و دڵخۆشی بۆ خەڵک بهێنێت. 

 

سەروەر غەمبار، هاونیشتمانییەکە و دەڵێت: ئەگەر ئەو دوو حیزبە رێکنەکەون وڵات دەبێتە پاشاگەردانی و کەس بە کەس نابێت و مافیاگەری دەبێت، بۆیە دەبێت رێکبکەون. 

 

دوای نزیکەی چوار کاژێر گفتوگۆ و دانوستاندنی دوور و درێژ، شاندی مەکتەبی سیاسیی پارتی بەرەو هەولێر بەڕێکەوتنەوە. 

 

پشتیوان سادق بڵاویکردەوە، "کۆبوونەوەیەکی ئەرێنی باش" بەڕێوەچووە. 

 

ئەندامێکی سەرکردایەتیی یەکێتیش بە پێکەنینەوە دەڵێت: بەردەوام دەبین. 

 

سالار لالە سەرحەد، ئەندامی مەکتەبی سیاسیی یەکێتی گوتی: ئێمە هەمووکات لەگەڵ ئەنجامدانی هەڵبژاردنین کە لە سوودی خەڵکی بێت و 

کۆبوونەوەکان بەردەوام دەبن. 

 

هەردوو مەکتەبی سیاسیی پارتی و یەکێتی لە راگەیێندراوێکی هاوبەشدا، وێڕای جەختکردنەوە لە پاراستنی قەوارەی هەرێمی کوردستان و مافە دەستوورییەکانی، لەسەر 5 خاڵ رێککەوتوون. 

 

دەقی راگەیێندراوە پێنج خاڵییەکەی پارتی و یەکێتی کە لە کۆبوونەوەکە لەسەری رێککەوتوون:

 

1- هەردوولا پشتیوانی لە ئەنجامدانی هەڵبژاردنی پەرلەمانی کوردستان دەکەین لەو کاتەی لەلایەن سەرۆکی هەرێمی کوردستان دیاریدەکرێت لە دوای راوێژ لەگەڵ لایەنە سیاسییەکانی هەرێمی کوردستان.

 

2- بۆ زیاتر خزمەتکردنی خەڵکی کوردستان لە هەموو روویەکەوە کێشە و جیاوازییە بچووکەکان بەلاوە بخرێن و روو لە پێکەوە چارەسەرکردنی کێشەکان بکەین.

 

3- بڕیارماندا پرۆسەی رێکخستنەوەی هێزەکانی پێشمەرگە بەردەوام بێت.

 

4- هەردوولا بڕیارماندا پشتیوانی لە رێککەوتنەکانی کابینەی نۆیەمی حکومەتی هەرێمی کوردستان بکەین.

 

5- لەپێناو زیاتر لێکنزیکبوونەوە و بەرەنگاربوونەوەی ئاڵنگاری و سەرکەوتن بەسەر کۆسپەکاندا، بڕیارماندا بە رۆحیەتی کوردستانیانە و نیشتمانپەروەرانە بەردەوامی بدەین بە کۆبوونەوە دوو قۆڵییەکان و هەماهەنگیمان لەگەڵ سەرجەم لایەنەکان.