رووداو دیجیتاڵ
سەرۆکی دەستەی وەبەرهێنان دەڵێت، بڕیارە لە 1ـی ئایار تاوەکو 30ـی ئایار، کارکردن لە سەرجەم ئەو 20 هەزار یەکەی نیشتەجێبوونە دەستپێبکات، کە بۆ کەمدەرامەت و کرێچییەکان دروست دەکرێن.
رۆژی شەممە 29-04-2023، د. محەممەد شوکری، سەرۆکی دەستەی وەبەرهێنانی هەرێمی کوردستان بە تۆڕی میدیایی رووداوی گوت "لە زۆربەی پارێزگا و ئیدارە سەربەخۆکان، زەوی بۆ 20 هەزار یەکەی نیشتەجێبوونەکان دابین کراوە و وەبەرهێنەریش دیاریکراوە. رێنمایی دەستبەکاربوونیش بۆ پارێزگا و ئیدارەسەربەخۆکان نێردراوە و هەوڵدەدەین مانگی داهاتوو دەست بە دروستکردنیان بکرێت".
پشکی هەولێر و ئیدارەی سەربەخۆی سۆران لەو 20 هەزار یەکەی نیشتەجێبوونە، شەش هەزار و 800 یەکەیە، پشکی پارێزگای سلێمانی، پێنج هەزار و 200 یەکەیە، پشکی دهۆک چوار هەزار و 500 یەکەیە، پشکی پارێزگای هەڵەبجە 440 یەکە و گەرمیان هەزار و 500 یەکەی نیشتەجێبوونی بەردەکەوێت.
سەرۆکی دەستەی وەبەرهێنانی هەرێمی کوردستان هەروەها گوتی "حکومەتی هەرێمی کوردستان لەرێگەی سندووقی وەبەرهێنانەوە یارمەتیدەر دەبێت بۆ ئەوەی خزمەتگوزارییەکان جێبەجێبکرێن و هەوڵدەدەین لەماوەی یەک ساڵدا ئەو پڕۆژەیە تەواوبکەین".
حکومەتی هەرێمی کوردستان لە مانگی ئایاری 2022 بڕیاری دروستکردنی 20 هەزار یەکەی نیشتەجێبوونی بۆ کەمدرامەتان دەرکرد. رۆژی 31-05-2022 مەسرور بارزانی، سەرۆکی حکومەتی هەرێمی کوردستان، لەوبارەوە سەرپەرشتیی کۆبوونەوەیەکی کرد و لایەنە پەیوەندیدارەکانی راسپارد، لە زووترین کاتدا دەست بە رێکارەکانی دروستکردنی ئەو یەکانە بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ