لە لوڕستان دەست بەسەر 345 کیلۆگرام تریاکدا گیرا

 

ئەمڕۆ (شەممە 30-03-2024) یەحیا ئیلاهی، بەڕێوەبەری پۆلیسی پارێزگای لوڕستانی رۆژهەڵاتی کوردستان رایگەیاند، لەلایەن تیمەکانی بەرەنگاربوونەوە و نەهێشتنی مادە هۆشبەرەکان لە شاری پۆلدۆختەری سەر بە پارێزگاکە، بارهەڵگرێک راگیراوە کە دوای پشکنینی ورد، دەرکەوت 345 کیلۆگرام مادەی هۆشبەری لە جۆری تریاک تێدا بووە و دەستی بەسەردا گیراوە. 

 

یەحیا ئیلاهی گوتی، پەیوەست بە دۆسیەکە دەست بەسەر بارهەڵگرەکەدا گیراوە و شۆفێرەکەشی دەستیگرکراوە، کە دوای کردنەوەی پەڕاوی لێکۆڵینەوە، رادەستی دەسەڵاتی دادی پارێزگاکە دەکرێت.

 

بەگوتەی بەڕێوەبەری پۆلیسی پارێزگاکە، ئەو بڕە تریاکە لە پارێزگاکانی باشووری ئێرانەوە هێنراوەتە لوڕستان و لەوێوە هەوڵی گواستنەوەی بۆ پارێزگاکانی دیکەش دراوە. 

 

وەک یەحیا ئیلاهی ئاماژەی دا، تیمەکانیان بەدواداچوونی ورد بۆ سەرچاوەی سەرەکیی هێنانی مادە هۆشبەرەکە دەکەن و لەوبارەوە لەگەڵ پۆلیسی پارێزگاکانی دیکەش لە پەیوەندیی چڕدان.

 

رۆژی 23-03-2024 بەڕێوەبەرایەتیی پۆلیسی لوڕستان رایگەیاند، ''مانگی رابردوو لەو پارێزگایە دەست بەسەر 395 کیلۆگرام مادەی هۆشبەر و چوار هەزار و 774 حەبی کارلێکەرە عەقڵییەکاندا گیراوە و 220 کەسیش دەستگیرکراون.''