هێڤیدار زانا، بووڵتەنێکی تایبەتی لەسەر ناوچە گەشتیارییەکانی دێرسم پێشکێش کرد.
رووداو دیجیتاڵ
پارێزگای دێرسمی باکووری کوردستان چەندین شوێنی گەشتیاری هەیە کە وای کردووە سەرباری رووبەری بچووکی، گەشتیارێکی زۆر ساڵانە رووی تێبکەن. بەڕێوەبەری کولتوور و گەشتیاریی شارۆچکەی پلوور لە پارێزگای دێرسم دەڵێت، لە ساڵی 2023دا نزیکەی 484 هەزار گەشتیاری بیانی و نێوخۆیی روویان لەو پارێزگایە کردووە. بەڕێوەبەری ناحیەی پلووریش دەڵێت، بەهۆی کەمی بودجەوە نەیانتوانیوە ژێرخانێکی بەهێزی گەشتیاری بنیات بنێن و "هەموو هەوڵەکانمان خستووەتەگەڕ بۆ ئەوەی بتوانین زیاترین گەشتیار بۆ ناوچەکەمان رابکێشین".
پاراستنی ئاژەڵ و باڵندە کێوییەکان
پارێزگای دێرسم یەک لە پارێزگا گەشتیارییەکانی باکووری کوردستانە کە زۆربەی دانیشتوانەکەی کوردی عەلەوین و بە شێوەزاری زازایی دەدوێن. بەهۆی باوەڕە ئاینییەکەیان کە راوکردن رەت دەکاتەوە، باڵندە و ئاژەڵە کێوییەکانی بە باشی پارێزراون و تێپەڕینی رووباری مونزووریش بەنێو شاری دێرسمدا دیمەنێکی سەرنجڕاکێشی بە شارەکە بەخشیوە.
بەگوێرەی دوایین ئاماری بەڕێوەبەرایەتیی ناوەندی ئاماری تورکیا، ژمارەی دانیشتووانی پارێزگای دێرسم 84 هەزار و 366 کەسە.
ناوەندی خلیسکێنەی پلوور کە بە دووری 50 کیلۆمەتر لە شاری دێرسم هەڵکەوتووە، ناوەندێکی گەشتیاریی زستانەیە کە سەرنجی گەشتیارانی بیانی و نێوخۆیی بۆلای خۆی رادەکێشێت.
پارێزگای دێرسم کە بە زێدی سەیید رەزا دێرسمی ناسراوە، لەلایەن حکومەتی تورکیاوە وەکو پارکێکی نیشتمانی تۆمارکراوە و بووەتە شوێنێکی ئارام بۆ حەوانەوەی ئاژەڵ و باڵندە کێوییەکان، بۆیە دروستکردنی هۆتێل و چێشتخانە و هەر ناوەندێکی دیکە بۆ پەرەپێدانی کەرتی گەشتیاری، دەبێ بەگوێرەی ئەو رێنماییانە بێت کە تایبەتن بەو ناوچانەی وەکو پارکی نیشتمانی تۆمارکراون؛ بۆیە لەو پارێزگایە زنجیرە هۆتێلی گەورە نییە، بەڵام خانوو و ڤێلا زۆرن بۆ میوانداریکردنی گەشتیاران.
لە دێرسم کێشەی "کەمی هۆتێل و میوانخانەمان هەیە"
رۆژی سێشەممە 30ـی کانوونی دووەمی 2024، تۆڕی میدیایی رووداو بووڵتەنی کاژێر 15:00ی تایبەت بە باکووری کوردستان و تورکیای لە ناوەندی خلیسکێنەی پلوور لە پارێزگای دێرسم پێشکێشکرد. ئەو ناوەندە لە بناری چیای مونزوورە و لە وەرزی زستاندا بەفرێکی زۆری لێ دەبارێت و بۆ ماوەی چوار مانگ بە سپیپۆشی دەمێنێتەوە.
عیسمەت هاکان، بەڕێوەبەری کولتوور و گەشتیاریی پلوور لە پارێزگای دێرسم میوانی بووڵتەنەکە بوو و رایگەیاند، "ناوچەکەمان زیاتر لە مانگی تەممووز و ئابدا گەشتیاری بۆ دێت؛ وەرزی زستانیش لەگەڵ کردنەوەی ناوەندی خلیسکێنە هەندێ جووڵەی گەشتیاری دروست دەبێت، بەڵام بەو ئاستەی وەرزی هاوین نییە و زۆربەی هۆتێل و میوانخانەکان بەتاڵن".
عیسمەت هاکان دەڵێت، "لە هەموو پارێزگای دێرسم کێشەی هۆتێل و شوێنی مانەوە بۆ گەشتیاران هەیە؛ لە ناوچەی پلووریش هەمان کێشەمان هەیە، ئەوەش وایکردووە گەشتیار کەمتر روو لە ناوچەکەمان بکەن، واتە نەگەیشتووینەتە ئەو ئاستە کە بڵێین دێرسم و ناوچەکەی ئێمە بوونەتە ناوەندێکی گەشتیاری".
ساڵی رابردوو زیاتر لە 480 هەزار کەس چوونەتە دێرسم
بەڕێوەبەری کولتوور و گەشتیاریی پلوور دەڵێت، سەرباری ئەوەی ژێرخانی گەشتیاری لە پارێزگای دێرسم بەهێز نییە، بەهۆی سەرنجڕاکێشیی سرووشت و کولتووری خەڵکەکەی، بەڵام ساڵی رابردوو زیاتر لە 480 هەزار گەشتیار سەردانی پارێزگاکەیان کردووە.
عیسمەت هاکان گوتی، "ئەم ساڵ نزیکەی 30 هەزار گەشتیاری خۆجێیی هاتوونەتە ناوەندی خلیسکێنەی پلوور و ژمارەیەکیش گەشتیاری بیانیمان هەبوون".
بەڕێوەبەری کولتوور و گەشتیاریی پلوور ئاماژەیدا بەوەی کە "بەگوێرەی ئەو ئامارانەی خۆمان لە دێرسم کۆمانکردوونەتەوە، 484 هەزار گەشتیاری بیانی و خۆجێیی لە ساڵی 2023 سەردانی پارێزگای دێرسمیان کردووە".
بە گوتەی عیسمەت هاکان، گەشتیارە بیانییەکان زۆربەیان لە ئەڵمانیا، بەلجیکا و هۆڵەنداوە سەردانیان کردووە و دەشڵێت، "دێرسم فڕۆکەخانەی نییە؛ بۆیە گەشتیاران تاوەکو خارپێت دەتوانن بە فڕۆکە بێن و لەوێشەوە بە ئۆتۆمبێل دێنە پارێزگاکەمان".
سرووشتی دێرسم "دەستلێنەدراوە"
پارێزگای دێرسم ناوچەیەکی شاخاوییە و خەڵکەکەی زیاتر بە کشتوکاڵ، ئاژەڵداری و هەنگەوانییەوە سەرقاڵن. هەنگوین و رۆن و پەنیری دێرسم لە باکووری کوردستان و تورکیا ناوبانگیان هەیە. دێرسم لەڕووی بەرهەمە کشتوکاڵی و شیرەمەنییەکانیشەوە بووەتە ناوەندێکی باش بۆ هەناردەکردنی بەرهەمەکانی.
مستەفا ساروگول، بەڕێوەبەری شارۆچکەی پلوور لە بووڵتەنەکەدا بەشدار بوو و گوتی،"ناوەندی خلیسکێنەی پلوور یەکێک لە ناوەندە هەرە گرنگەکانی ناوچەکەمانە بۆ راکێشانی گەشتیاری زستانە. گرنگییەکی دیکەی گەشتیاری ناوچەکەمان هەبوونی رووباری مونزوورە کە بە درێژایی 75 کیلۆمەتر بە پارێزگاکەماندا تێدەپەڕێت و دەڕژێتە نێو بەنداوی دێرسم".
رووبار و چیای مونزوور بەلای خەڵکی دێرسمەوە پیرۆزن و وەکو مستەفا سارگول باسی دەکات، "بەهۆی پیرۆزیی رووبار و چیای مونزوور، خەڵک بەجوانی دەیانپارێزن، ئەوەش وای کردووە ناوچەکەمان سرووشتەکەی بە دەستلێنەدراوی بمێنێتەوە".
بە درێژایی رووباری مونزوور چەندین شوێنی گەشتیاری درووستکراون و 25 کیلۆمەتری رووبارەکەش بۆ وەرزشی رافتینگ تەرخانکراوە؛ هاوکات پارێزگای دێرسم بە زنجیرە چیای مونزوور دەوردراوە کە بووەتە هۆی ئەوەی پەرە بە وەرزشی شاخەوانی بدرێت. بەڕێوەبەری ناحیەی پلوور باس لە هەبوونی تاڤگەی زۆر سەرنجڕاکێش لە چیاکاندا دەکات و دەشڵێت، "کۆمەڵێک شوێنەواری کۆن لە دێرسم هەن کە رۆژانە خەڵکێکی زۆر بۆ بینینیان دێن و سەردانمان دەکەن".
"بودجەی دێرسم کەمە"
مستەفا ساروگول دەڵێت، بەهۆی ئەوەی دێرسم لە چەند شارەوانییەکی بچووک پێکهاتووە، بودجەیەکی ئەوتۆی بۆ تەرخان ناکرێت بۆ بەهێزکردنی ژێرخانی گەشتیاری و خزمەتگوزارییەکانی تایبەت بە گەشتیاران.
بەڕێوەبەری شارۆچکەی پلوور دەڵێت، "نەبوونی بودجەی گەورە وایکردووە ژێرخانی گەشتیاریمان بە لاوازی بمێنێتەوە، بەڵام هەوڵدەدەین هەندێک خزمەتگوزاری سەرەتایی بۆ گەشتیاران دەستەبەر بکەین".
رووباری موونزوور بە ناوەندی شاری دێرسمدا تێدەپەڕێت و پارێزگاکەش چواردەوری شاخە. تیمەکانی فریاکەوتن کە پێکهاتوون لە تیمی مەلەوانی و شاخەوانی، لەو پارێزگایەدا رۆژانە بە بەردەوامی لەکاردان، بەتایبەت زستانان لە چیاکان و لە وەرزی هاوینیشدا کە خەڵک بۆ مەلەکردن دەچن بۆ رووباری مونزوور.
مەهمەد بیداڤ، سەرۆکی تیمی بەهاناوەچوون و شاخەوانی مووداک لە میانی بەشداریکردنی لە بووڵتەنەکەدا گوتی، "ناوچەکەمان شاخاوییە، بەتایبەت لە وەرزی زستاندا تیمەکانی شاخەوانی رووبەڕووی ئاستەنگ دەبنەوە. تیمەکانی ئێمە بەردەوام لە ئامادەباشیدان بۆ بەهاناوەچوون و تیمی فریاکەوتنی سەرەتایی و مەلەوانیشمان هەن بۆ رووداوی هاتووچۆ و ئەو کەسانەی دەکەونە نێو رووبارەوە".
مەهمەد بیداڤ دەشڵێت، "تیمەکەمان لە 140 کەس پێکهاتووە کە سەرجەمیان راهێنانی باشیان پێکراوە و ماوەی پێنج ساڵە کارمان دەستپێکردووە کە لەو ماوەیەدا بەشداریمان لە 150 ئۆپەراسیۆن کردووە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ