لە سێ رووداوی شەڕکردندا لە سنووری کەرکووک کەسێک گیانی لەدەستدا و برینداریش هەن

 

سەرچاوەیەکی ئەمنیی سنوورەکە، بە تۆڕی میدیایی رووداوی راگەیاند، "دوو کەس کە خاڵۆزا و پورزای یەکدین، بووەتە شەڕیان و لە ئەنجامدا تەقەکراوە، بەهۆیەوە کەسێک بەناوی توانا فەتحوڵڵا برینداربووە، بەڵام بەهۆی سەختی برینەکەیەوە بەر لەوەی بگەیێندرێتە نەخۆشخانە گیانی لەدەستداوە."

 

ئەو سەرچاوە ئەمنییە بە رووداوی گوت، "هەر ئەمڕۆ لەئاهەنگێکی بووک گواستنەوە شەڕە چەقۆ دروست بووە و گەنجێک بەناوی هەڤاڵ هونەر بەسێ چەقۆ بریندار بووە و رەوانەی نەخۆشخانەی ئازادی فێرکاری کراوە."

 

بەپێی زانیارییەکانی هەردی محەممەد، پەیامنێری رووداو لە کەرکووک، هەر لە کۆمەڵگەی سمایل بەگی سنووری ناحیەی شوان، ئەمڕۆ هەینی، لە رووداوێکی دیکەدا، پیاوێک بە چەکەوە هەڵیکوتاوەتە سەر ماڵێک کە پێشووتر کێشەی کۆمەڵایەتییان هەبووە و تەقەی لە ماڵەکە کردووە، بەڵام لە رووداوەکەدا هیچ زیانێکی گیانی نەبووە.