رووداو دیجیتاڵ
لە ئۆپەراسیۆنێکی هێزە ئەمنییەکانی تورکیا لە پارێزگای دێرسمی باکووری کوردستان 11 کەس بە تۆمەتی بازرگانیکردن و بەکارهێنانی ماددەی هۆشبەر دەستبەسەر کران.
ئۆپەراسیۆنەکە درەنگانی شەوی چوارشەممە 28ی کانوونی یەکەمی 2022 لە شارۆچکەکانی چەمیشگەزەک و خۆزات بەڕێوەچوو.
بەگوێرەی راگەیێندراوەکە، تیمەکانی فەرماندەیی جەندرمە لەو دوو شارۆچکەیەدا ئۆپەراسیۆنیان دژی فرۆشیارانی ماددەی هۆشبەر لەسەر شەقامەکان کردووە و هەڵیانکوتاوەتە سەر چەندین ناونیشان، کە پێشتر دەستنیشان کراون و 11 کەس دەستبەسەر کران.
لە کاتی ئۆپەراسیۆنەکەدا بڕێک هێرۆین و دوو تفەنگی راو دەستیان بەسەردا گیراوە.
ئەوەش لە کاتێکدایە بەکارهێنان و بازرگانیکردن بە ماددە هۆشبەرەکان لە باکووری کوردستان و تورکیا زیادیکردووە.
سولەیمان سۆیلو، وەزیری ناوخۆی تورکیا رۆژی 7ی تشرینی دووەمی ئەمساڵ لە کۆنگرەیەکی رۆژنامەڤانیدا رایگەیاند، هەفتانە 5000 کەس بە تۆمەتی بازرگانی یان بەکارهێنانی ماددە هۆشبەرەکان دەستگیر دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ