فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان و سەنگەر عەبدولڕەحمان
رووداو دیجیتاڵ
سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان، دەستبەکاربوونی محەممەد شیاع سوودانی بە دروستبوونی ئاسۆیەکی روون وەسف دەکات بۆ جێبەجێکردنی مادەی 140 و لەبارەی کاریگەریی کێشە ناوخۆییەکانی هەرێمی کوردستانیش دەڵێت: "ناکۆکییە ناوخۆییەکان هیچ رێگرییەک بۆ چارەسەری کێشەی ناوچە کوردستانییەکان دروست ناکات".
رۆژی شەممە 29-10-2022 فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان میوانی بووڵتەنی نیوڕۆژی تۆڕی میدیایی رووداو بوو کە سەنگەر عەبدولڕەحمان پێشکێشی دەکات و رایگەیاند: "دەستبەکاربوونی سەرۆککۆماری نوێ و پێکهێنانی حکومەتی نوێی عێراق، ئاسۆی گفتوگۆیەکی باشتر دروست دەکات و ئەوەش پێماندەڵێت کە دەکرێ دەست بە گفتوگۆیەکی جیدیتر بکەین بۆ ئەو بەڵێنانەی بە خەڵکی کوردستان دراون".
فەهمی بورهان گوتی: "ناوچە کوردستانییەکانی دەرەوەی ئیدارەی هەرێمی کوردستان بەشێکن لە ستراتیژیی ئێمە. ئاسۆیەکی روون هەیە کە دەکرێ رووبەری ئەو ئاسۆیە فراوانتر بکەین، ئەو بەڵێنانەی لە کارنامەی محەممەد شیاع سوودانیدا هەن، هەوڵ و کۆششی هەموو لایەنە کوردستانییەکانە و با وەک پرسێکی نیشتمانی و نەتەوەیی هەوڵی چارەسەرکردن و جێبەجێکردنیان بدەین".
سەرۆکی دەستەی ناوچە کوردستانییەکانی دەرەوەی هەرێمی کوردستان پێیوایە: "ئەو بەڵێنانەی لەناو کارنامەی حکومەتی نوێی عێراق هەن، ناکرێ بڵێین هەموو ئاوات و ئامانجی ئێمەیە، بەڵام لەچاو کابینەکانی پێشتر ئاسۆی روونتر لەم کابینەیەدا بەدیدەکرێت، کێشەکانی ئێمە لەگەڵ بەغدایە و بە گوتاری سیاسی چارەسەر ناکرێت و دەبێ بە گفتوگۆی هێمنانە هەوڵی چارەسەریان بدەین".
بە گوتەی فەهمی بورهان: "ئاڵنگاریی گەورە لەبەردەم حکومەتی سوودانیدا هەیە و ئێمە دەبێت لە هەرێمی کوردستان هاوکاری بکەین بۆ ئەوەی ئەو بەڵێنانەی داویەتی جێبەجێ بکرێن، ئەوەش وادەکات ئەو بارگرژییەی لە ماوەکانی پێشووتردا لە نێوان حکومەتی هەرێمی کوردستان و عێراق هەبوون، بەرەو رەوینەوە بڕوات".
لەبارەی نێوەڕۆکی ئەو رێککەوتنەی لە کارنامەی سەرۆکوەزیرانی نوێی عێراقدا بۆ ناوچە کوردستانییەکان کراوە، فەهمی بورهان ئاماژەی بەوە دا: "ئەو ماوە زەمەنییەی لەناو رێککەوتنەکەدا دیاریکراوە بۆ زیندووکردنەوەی مادەی 140ە، بڕیارە لیژنەی مادەی 140 چالاک بکرێتەوە و کۆمەڵێک کەسایەتی بچنە ناو لیژنەکە و بەپێی دەستوور یاساکە جێبەجێ بکرێت، بۆ ئەو پرسەش د. خالید شوانی، وەزیری دادی عێراق بەڵێنی داوە هەموو هاوکارییەکی یاساییمان بکات".
بە گوتەی سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان: "چارەسەری کێشەکانی نێوانمان دوولایەنەیە، هەم ئێمە دەبێ بەرنامەی خۆمان هەبێت و دنیابینیمان روونبێت بۆ چارەسەر و هەم حکومەتی عێراقیش پابەندی ئەو بەڵێنانەبێت کە لە کارنامەکەیدا پێشکەشی کردووە".
فەهمی بورهان پێیوایە: "رێککەوتنەکە جۆرێک لە هیوای لای ئێمە دروستکردووە کە پێموایە دەکرێ بیکەین بە سەرەتایەک، بەڵام یەکسان نییە بەوەی پێمانوابێت کۆی داواکارییە دەستوورییەکانمان لەماوەی شەو و رۆژێکدا چارەسەردەبێت".
پارتی و یەکێتی لە هەرێمی کوردستان و لە بەغداش ناکۆکییان لەسەر کۆمەڵێک پرس هەیە و فەهمی بورهان پێیوایە، جێبەجێکردنی مادەی 140 نابەستنەوە بە کێشەکانی نێوان پارتی و یەکێتی و دەڵێت: "پرسی ناوچە کوردستانییەکان لە سەرووی هەموو گرفت و کێشەکانەوەن و لە سەرەتاشەوە باسمان کردووە کە نابێ ئەو پرسانە بەشێک بن لە کێشە ناوخۆییەکانی هەرێمی کوردستان و بەبەردەوامی دەبێ کار بۆ چارەسەرکردنیان بکەین".
فەهمی بورهان دووپاتیدەکاتەوە: "هەر نیەتێک بۆ چارەسەری ئەو پرسە هەبێت، هیچ گرفتێکی لە هەرێمی کوردستانەوە ناخرێتە بەردەم و هەموو هەوڵمان ئەوەبووە هەموومان کۆدەنگبین لەسەر پرسی سنووری مادەی 140 و ئەو کارنامەیەی لە حکومەتی عێراق بۆ چارەسەری ئەو کێشەیە هەیە، کارنامەی هاوبەشی لایەنەکانی هەرێمی کوردستانە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ