رووداو دیجیتاڵ
لە هەڵبژاردنی 20-10-2024 ـی پەرلەمانی کوردستان، هەمان ئامێرە ئەلیکترۆنییەکانی هەڵبژاردنی ساڵی 2023ـی ئەنجوومەنی پارێزگاکان بەکاردەهێنرێن، بەڵام کۆمیسیۆن دەڵێت، "بەرنامە و سیستمی کارکردنی ئامێرەکان نوێیە و تایبەتە بە هەڵبژاردنی پەرلەمانی کوردستان و تەنیا یەک جار بەکاردێت".
د. عیماد جەمیل، سەرۆکی تیمی میدیایی کۆمیسیۆنی هەڵبژاردنەکانی عێراق بە رووداوی گوت، "هەموو ئەو کارمەندانەی سەرپەرشتیی ئامێر و پرۆگرامەکە دەکەن، دانیشتووی هەرێمی کوردستانن، کە فەرمانبەر و خوێندکارانی زانکۆن و هیچ کارمەندێکی بیانی سەرپەرشتیی پرۆسەی ئەلیکترۆنی و تەکنیکی دەنگدان ناکات".
لە هەڵبژاردنی ئەمجارەی پەرلەمانی کوردستاندا، کۆمیسیۆنی باڵای سەربەخۆی هەڵبژاردنەکان سیستمێکی نوێی ئەلیکترۆنی و کاخەزی دەنگدانی نوێ بەکاردەهێنێت، بەڵام ئامیرەکانی دەنگدان، هەمان ئامێرە ئەلیکترۆنییەکانن، کە لە هەڵبژاردنی رابردووی ئەنجوومەنی پارێزگاکانی عێراق بەکارهێنراون، بەڵام بەرنامەکان و سیستمی کارکردنیان جیاوازە.
د. عیماد جەمیل دەڵێت، "بەرنامەکان بەگوێرەی هەڵبژاردنی پەرلەمانی کوردستان رێکخراون و تەنیا یەک جار بەکاردەهێنرێن، چونکە ئەم جارە ژمارەی دەنگدەران و بازنەکانی هەڵبژاردن جیاوازە".
ئەو دەنگدانی ئەلیکترۆنییەی لەم هەڵبژاردنەدا بەکاردێت، پێی دەگوترێت "سیستمی هەڵبژاردنی پارێزراو"، سیستمەکە بە تەواوی پێشکەوتوو و پارێزراوە، هیچ کەسێک و تەنانەت کۆمیسیۆنی هەڵبژاردنەکانیش نازانێت دەنگدەر دەنگی بە چ لیست و بەربژێرێک داوە و نهێنیی دەنگدەر بە تەواوی پارێزراوە تێیدا.
دەنگدەر کاتێک لە رێگەی کارتی بایۆمەتریی دەنگدانەوە بە شێوەیەکی ئەلیکترۆنی خۆی دەسەلمێنێت و پەنجەمۆری وەردەگیرێت، کارتێکی دەنگدان کە کۆدی تایبەتی لەسەرە، بە سندووقی دەنگدان ئاشنا دەکرێت و کاتێک دەنگدەر لە وێستگەی دەنگدان دەنگ بە لیست و بەربژێرەکان دەدات و کارتەکە دەگەڕێنێتەوە بۆ سندووقی دەنگدان، ئەگەر هەمان کۆدی ئاشناکراو نەبێت و کارتەکە گۆڕدرابێت، ئەوا سندووقەکە رەتیدەکاتەوە و رێگە بە چوونەناوەوەی کارتەکە نادات.
پێشتر کۆمیسیۆن بۆ رووداو جەختیکردووەتەوە "سیستمەکە هیچ کەلێنێکی تێدا نییە تاوەکو لایەنێک یان کەسێک بزانێت دەنگدەر دەنگی بە چ لیستێکی سیاسی و چی بەربژێرێک داوە، کۆمپانیای دروستکەری سیستمەکە گەرەنتیی تەواوی داوە لە پارێزراوی و سەرکەوتوویی ئەو سیستمە، کە یەکەمجارە لە پرۆسەی هەڵبژاردنی پەرلەمانی کوردستان بەکاردێت".
رۆژی پێنجشەممە 26-9-2024 لە هەرێمی کوردستان دەستکراوە بە راهێنانی 41 هەزار کارمەندی سەر سندووقەکانی دەنگدان، کە لەلایەن کۆمیسیۆنەوە ناویان دەرچووە بۆ بەڕێوەبردنی پرۆسەی هەڵبژاردن.
لەبارەی ئەو کارمەندانەی کار لەسەر ئامێر و سیستمەکە دەکەن، د. عیماد جەمیل بە رووداوی راگەیاند "هەموو ئەو کارمەندانەی کار لەسەر ئامێر و سیستمەکە دەکەن، کارمەندانی خەڵکی هەرێمی کوردستانن و لەلایەن بەشی راهێنانی کۆمیسیۆن لە شارەکان، لەسەر بەکارهێنانی ئامێرەکان بە شێوەیەکی باش راهێنانیان پێدەکرێت و ئامادە دەکرێن، هیچ کارمەندێکی بیانی سەرپەرشتیی ئامێر و بەرنامەکان ناکات".
سیستمی ئەلیکترۆنی بە شێوەیەکی خودکاری کاژێر 06:00ی ئێوارە سندووقەکانی دەنگدان دادەخات و رێگە بە درێژکردنەوەی کاتی دەنگدان نادات، هاوکات هەر دوای تەواوبوونی کاتی دەنگدان هەر سندووقێک ئەنجامی دەنگەکانی خۆی چاپ دەکات و لە ماوەی 24 کاژێریشدا ئەنجامی بەرایی هەڵبژاردن دەردەکەوێت. جگە لەوەی کە سندووقەکان بەشێوەی ئەلیکترۆنی ئەنجامەکان دەردەخەن، بەگوێرەی بڕیاری کۆمیسیۆن هەموو کارتەکانی دەنگدانیش بە شێوەی دەستی دووبارە دەژمێردرێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ