رووداو دیجیتاڵ
کۆمیسیۆنی باڵای هەڵبژاردنەکانی عێراق، بۆ هەڵبژاردنەکانی پەرلەمانی کوردستان سێ ئامێر، کە پرۆسەی دەنگدان و ژماردنی دەنگەکان خێراتر و دروستتر دەکات، بەکاردەهێنێت.
بەگوێرەی بەدواداچوونەکانی تۆڕی میدیایی رووداو، بۆ هەڵبژاردنەکانی پەرلەمان، کە بڕیارە لە 20ـی ئۆکتۆبەر بەڕێوەبچێت، کۆمیسیۆنی باڵای هەڵبژاردنەکانی عێراق، سێ ئامێری ئەلیکترۆنی بەکاردەهێنێت، بۆ خێراکردنی پرۆسەی دەنگدان و جیاکردنەوە و ژماردنی دەنگەکان و دواتریش بۆ رەوانەکردنی ئەنجامی بنکە و وێستگەکان لەڕێگەی ئامێری ئەلیکترۆنییەوە بۆ بەغدا.
سێ ئامێرە بریتین لە ئامێرەکانی سکانەری (PCOS). هەروەها ئامێری ژماردن و ریزکردنی ئەلیکترۆنی ناوەندی دەنگدان (CCOS). لەگەڵ ئامێری (RTS).
ئامێری PCOS:
ئامێری ئەلیکترۆنی ژماردن و ریزکردن ناسراو بە سکانەری (PCOS) تایبەتە بە ژماردنی دەنگی نێو سندووقەکان، بەشێوەیەکی ئەلیکترۆنی و بە راست و دروستی.
جۆری بەکارهێنانی بەشێوەیەکە، کە دەنگدەر لەکاتی دەنگداندا، کاخەزی دەنگدانەکەی دەخاتە نێو سندووقەکە و لەسەر سندووقەکە ئامێری سکانەرەکە دانراوە و کاخەزی دەنگدان بەنێو سکانەرەکەدا تێدەپەڕێت و تەواوی زانیارییەکان و دەنگەکان لەسەر ئامێرەکە بەشێوەیەکی دروست تۆمار دەکرێت.
هەر لەڕێگەی هەمان ئامێرەوە، لە کۆتایی پرۆسەی دەنگدان، تەواوی ژمارەی ئەو دەنگانەی لەنێو سندووقەکەدان، لەلایەن ئەو ئامێرەوە پێشان دەدرێت و ئەمەش خێراترین رێگەی پرۆسەی ژماردنەوەی دەنگەکانە بەڕێگەی ئەلیکترۆنی.
بۆ بەکارهێنانی ئەو ئامێرە، هەموو کارمەندێکی کۆمیسیۆن کە بەکاریدەهێنێت، پێویستیان بە کۆدی نهێنی هەیە تاوەکو بتوانن بچنە نێو سیستمەکەوە و کاری پێبکەن.
ئامێری CCOS:
پاشان لەسەر پشتی ئامێرەکە، دوای کۆتاییهاتنی پرۆسەی دەنگدان، پرۆسەی ژماردن و ریزکردنی ئەلیکترۆنی تەواو دەبێت و راپۆرتێک دەردەچێت.
قۆناخی داهاتوو بریتی دەبێت لە راپۆرتی کۆتایی ئەو سندوق و وێستگەیە و هەروەها کۆکردنەوەی و هەژمارکردنی سەرجەم دەنگەکانی وێستگەکە، بە رێگەی ئەلیکترۆنی رەوانەی ئامێرێک دەکرێت ناسراوە بە ئامێری ژماردن و ریزکردنی ئەلیکترۆنی ناوەندی دەنگدان (CCOS).
پاشان لەرێگەی ئەو ئامێرەوە پێداچوونەوە و پشتڕاستکردنەوەی سەرجەم دەنگ و داتاکان دەکرێت، پێش رەوانەکردنی داتا و زانیارییەکان بۆ بنکەی سەرەکی کۆمیسیۆن.
سیستمی تۆمارکردنی ئەنجامەکان (RTS):
پاش ئەو قۆناخە، لەگەڵ ژمارن و تۆمارکردنی سەرجەم دەنگەکان، دەگوازرێتەوە بۆ ناوەندی کۆکردنەوەی زانیاری لە ئۆفیسی نیشتمانی لە بەغدا، لەرێگەی ئامێرێک، کە بە سیستمی تۆمارکردن و راپۆرتکردنی ئەنجامەکان (RTS) ناسراوە.
ئەو ئامێرە بە پێشکەوتووترین و سەلامەتترین رێگەی ئەلیکترۆنیی بۆ گواستنەوەی ئەنجامەکانی هەڵبژاردن دادەنرێت. ئامێرەکە بە پەنجەمۆر کار دەکات و هەموو بنکە و وێستگەکان بۆ ناوەندی سەرەکی کۆمیسیۆنەوە دەبەستێتەوە و دواتر هەر لەرێگەی ئەو بەستنەوە ئەلیکترۆنییەوە، سەرجەم ژمارە و داتاکانی بنکە و وێستگەکان کۆدەکرێنەوە و رەوانە دەکرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ