کوردستان
بارەگایەکی حیزبە کوردییەکانی رۆژهەڵاتی کوردستان دوای بۆردوومانکردنی لەلایەن ئێرانەوە. وێنە: هۆرڤان رەفعەت - رووداو
رووداو دیجیتاڵ
ئەنجوومەنی جێبەجێکردنی یەکگرتووی ئیسلامیی کوردستان لەبارەی بۆردوومانەکانی ئێرانەوە راگەیێندراوێکی بڵاوکردەوە و جگە لە سەرکۆنەکردنی داوای کردووە، "هەرچی زووترە جەنگ و خوێنڕێژی و پێشێلكردنی سەروەریی خاكی هەرێمی کوردستان و عێراق بوەستێندرێت."
لە راگەیێندراوەکەی ئەنجوومەنی جێبەجێكردنی یەكگرتووی ئیسلامیی كوردستاندا هاتووە، وەکو هەمیشە سەرکۆنەی ئەو سنووربەزاندن و هێرشانە دەکەن، "بەداخەوە بۆ چەندەمین جار لەلایەن هێزی سەربازیی ئێران و توركیاوە بۆردوومانی ناوچە سنوورییەكان و بارەگای هێزە نەیارەکانیان دەكرێت."
یەکگرتووی ئیسلامی بۆردوومانەکانی ئێرانی بە "ناڕەوا" ناوبردووە و داوا دەکات، "هەرچی زووترە جەنگ و خوێنڕێژی و پێشێلكردنی سەروەریی خاكی هەرێمی کوردستان و عیراق بوەستێنرێت و ناوچەكە نەكرێتە جێی یەكلاكردنەوەی ململانێ سیاسییەكان."
هاوکات لە راگەیێندراوەکەیدا یەکگرتوو جەخت لەوە دەکاتەوە، کە "دژین بەوە خاكی هەرێمی كوردستان بكرێتە سەرچاوەی هەڕەشە لەسەر وڵاتانی دراوسێ و گۆڕەپانی ململانێی خاوەن بەرژەوەندییەكان لە دوور و نزیک."
ئەو حیزبەی هەرێمی کوردستان داوا لە دەوڵەتی فیدراڵیی عیراق دەکات، "سەروەریی وڵات بپارێزێت و كێشە هاوبەشەكانی لەگەڵ وڵاتانی دراوسێ بە گفتوگۆ و دانوستاندن یەكلایی بكاتەوە.'
لە هێرشەکانی رۆژی چوارشەممەدا کە بەگوێرەی سوپای پاسداران لەڕێگەی 73 مووشەک و دەیان درۆنی بۆمبڕێژکراوەوە ئەنجامدراون بۆسەر بنکە و بارەگاکانی پارتەکانی رۆژهەڵاتی کوردستان لە کۆیە، زڕگوێز و شێراوە، لانیکەم 15 کەس گیانیان لەدەستدا و سەرووی 45 کەسی دیکەش برینداربوون، کە ژن و منداڵیشیان لەنێودابوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ