کۆمیسیۆن پێنج کاخەزی دەنگدانی بۆ هەڵبژاردنی پەرلەمانی کوردستان پەسندکرد

 

جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی راگەیاند: "ئەنجوومەنی کۆمیسیاران پێنج نموونەی سەرەتایی دەنگدانی بۆ هەڵبژاردنی پەرلەمانی کوردستان پەسندکرد، هەر پارێزگایەک لە پارێزگاکانی هەولێ، سلێمانی، دهۆک و هەڵەبجە، نموونەی کاخەزی تایبەت بەخۆیان هەیە، جگە لەوەش نموونەیەکی کاخەزەکە بۆ دەنگدانی تایبەت دەبێت."

 

گوتەبێژی کۆمیسیۆنی باڵای سەربەخۆی هەڵبژاردنەکانی عێراق رەتیکردەوە، ئەمە نموونەی کاخەزی کۆتایی دەنگدان بێت و گوتی: "ئەو کاخەزانە سەرەتایین، کاتێک کە تیروپشک بۆ هاوپەیمانێتی و پارتە سیاسییەکان و بەربژێرانی تاکە کەس دەکرێت، ژمارەکانیان دەخرێتە سەر کاخەکە و دەبێتە کۆتایی و دەنگی لەسەر دەدرێت."

 

بە گوتەی جومانە غەلای لە نیوەی یەکەمی مانگی داهاتوو تیروپشک بۆ ئەو هاوپەیمانێتی و پارت و بەربژێرە تاکەکەسییانە دەکرێت کە بەشداردەبن لە هەڵبژاردنی پەرلەمانی کوردستان ، دەشڵێت: "ژمارەی کاخەزەکانی دەنگدان لە ژمارەی دەنگدەران زیاتر دەبێت."

 

بەپێی کۆمیسیۆنی باڵای سەربەخۆی هەڵبژاردنەکانی عێراق، لە هەرێمی کوردستان دوو ملیۆن و 888 هەزار و 162 کەس لە هەرێمی کوردستان مافی دەنگدانیان هەیە.

 

1198 بەربژێر وەک سەربەخۆ، بەربژێری کۆتای پێکهاتە، لیستى پارت و هاپەیمانێتییەکان ناوى خۆیان تۆمارکردووە بۆ هەڵبژاردنى خولی شەشەمی پەرلەمانى کوردستان کە بڕیارە لە 20ی تشرینی یەکەمی ئەمساڵدا بکرێت.