بەڕێوەبەرایەتیی خۆسەر: بەندکراوەکەی چاكسازیی حەسەكە بە جەڵتەی مێشک مردووە

 

 

بەگوێرەی روونكردنەوەكە، رۆژی 28ی حوزەیران، بەڕێوەبەرایەتیی ناوەندی چاكسازیی غوێران لە حەسەكە هەواڵی گیان لەدەستدانی گیراوێك پێی راگەیاندووین. رێوشوێنی یاسایی گیرایەبەر و تەرمی کەسەکە گواسترایەوە دادپزیشكی نەخۆشخانەی شەهید ساریە بۆ توێكاری و ئاگاداركردنەوەی لایەنە پەیوەندیدارەكان و داواكاری گشتیی و پزیشكی دادی.   

 

هەر بەگوێرەی راگەیێندراوەكە، دوای لێكۆڵینەوە و پرسیاركردن، دەركەوت، ئەو كەسەی گیانی لەدەستداوە، بەتۆمەتی گەندەڵی و پێدانی بەرتیل راگیرا بوو. خۆیشی پێشتر نەخۆش و كێشەی تەندروستیی هەبووە و بەردەوام كەسوكارەكانی لەكاتی سەردانیكردنیدا دەرمان و چارەسەریی پزیشكیان بۆ دەهێنا.

 

لە راگەیێندراوەکەدا هاتووە: "لە ئەنجامی راپۆرتی توێكاریی کە لەلایەن پزیشکانەوە واژۆ كراوە، دەركەوت هیچ شوێنەوارێكی تووندوتیژی و ئەشكەنجە لە جەستەیدا نەبینراوە و هۆكاری گیان لەدەستدانیشی جەڵتەی مێشك بووە". 

 

هەر بەگوێرەی رێكارەكانەوە بانگهێشتی كەسوكاری كرا و لەنێویاندا براكەی و هەواڵی گیان لەدەستدانی براكەی لەلایەن كەسانی پەیوەندیدارەوە پێڕاگەیێندرا و ئاگاداریش كرانەوە لە هەر گومانێكدا دەتوانن خۆیان پشكنینی بۆ بكەن و خۆیان پێنج پزیشك دەستنیشان بكەن بۆ ئەوەی توێكاری نوێ بۆ تەرمەکەی بكرێت و هۆكاری گیان لەدەستدانەكەی بە راپۆرت پێشكەشیان بكرێت. بەڵام كەسوكارەكەی، تەرمەكەیان وەرگرتەوە و بە خاكیانسپارد بەبێ ئەوەی هیچ پشكنینێكی پزیشكی بۆ بكەن.

 

نووسینگەكە رایدەگەیێنێت، پێیان سەیر بووە لە بڵاوبوونەوەی هەواڵی گیانلەدەستدانی ناوبراو بەشێوەیەكی جیاواز و دوور لە راستی و بڵاوكردنەوەی وێنە و ڤیدیۆی تەرمەكە بەپێچەوانەی بنەما ئەخلاقی و رێكارە مرۆییەكان و شێواندنی راستییەكان. هەروەها  وێنەی ئەو تەرمەی بڵاوبووەتەوە هی ئەو كەسە نییە و بە فۆتۆشۆپ دەستکاری کراوە.

 

نووسینگەی كاروباری دادوەری و چاكسازی جەخت لەوە دەكاتەوە، بەڵگەنامەكانی دادپزیشكی، دەنگۆكان بەدرۆ دەخاتەوە و دەڵێت بڵاوكردنەوەی ئەم جۆرە وێنە و ڤیدیۆیانە تەنیا بۆ نانەوەی ئاژاوە و فیتنە و شێواندنی وێنەی هێزەكانی سووریای دیموكرات و بەڕێوەبەرایەتیی خۆسەری باكوور و رۆژهەڵاتی سووریایە. بۆیە لێرەوە بۆ رای گشتیی دووپاتی دەكەینەوە ئەوەی لە تۆڕە كۆمەڵایەتییەكاندا بڵاوكراونەتەوە پێچەوانەی هەموو بنەمایەكی ئەخلاقی و پیشەگەریی میدیاییە و بەهیچ شێوەیەك پەیوەندیی بە بەڕێوەبەرایەتییەكەمانەوە نییە و تەنیا بۆ نانەوەی كێشەیە.

 

نووسینگەی كاروباری دادوەری و چاكسازی دەڵێت لیژنەیەكی لێكۆڵینەوە  پێكدەهێنن و سەرجەم بەڵگەكانی پێش و پاش رادەستكردنی تەرمەكە بۆ كەسوكارەكەی دەخەنەڕوو. ئەگەر پێچەوانەكەشی دەركەوت و سەلمێنرا كە ئازاردراوە، هەر کەسێک بەرپرسیار بێت رووبەڕووی دادگا دەكرێتەوە.