شارەوانیی سلێمانی: پارەی زبڵ و خاشاک مەدەنە کۆمپانیاکان

 

 

زەردەشت رەفیق، گوتەبێژی سەرۆکایەتی شارەوانی سلێمانی، رۆژی دووشەممە 29-04-2024 بە تۆڕی میدیایی رووداوی گوت: "ماوەیەکە هەندێک کەس و لایەن، بەتایبەت هەندێک لە کرێکارانی کۆمپانیاکان بەناوی فڕێدانی زبڵ و خاشاکەوە پارە لە بەشێک لە شوێنەکانی وەکو چێشتخانە و نەخۆشخانە و تەنانەت ماڵانیش وەردەگرن، بەڵام ئەمە نابێت و رێگەپێدراو نییە."

 

سەرۆکایەتیی شارەوانیی سلێمانی لە ئاگادارکردنەوەیەکدا کە ئاڕاستەی دانیشتووانی شارەکەی کردووە دەڵێت: "ئاگاداری سەرجەم هاووڵاتیان بە گشتی، چێشخانە، رێستۆرانت، هۆتێل، نەخۆشخانە تایبەتەکان، پیشانگاکان و سەرجەم دوکاندارەکان بەتایبەتی دەکات کە گواستنەوە و فڕێدانی خۆڵ و خاشاکی ھەموو شوێنێکی ناو سنووری ماستەرپلانی شاری سلێمانی ئەرکی شارەوانییە، جگە لەو کۆمەڵگە نیشتەجێبوونانەی کە ھای کۆستن و ھەندێک شوێنی دیاریکراو."

 

بەپێی ئاگادارینامەکەی شارەوانی سلێمانی، تاکە لایەن کە مافی وەرگرتنی پارەی کرێی فڕێدانی خۆڵ و خاشاکی هەیە بەپێی بڕیاری ئەنجوومەنی وەزیرانی هەرێمی کوردستان، بەشی داھاتی شارەوانییە، هیچ کۆمپانیا و لایەنێک مافی کۆکردنەوەی ئەو داهاتەی نییە.

 

سێ کۆمپانیا لە رێگەی نزیکەی هەزار و 500 کرێکار نێو شاری سلێمانی لە زبڵ و خاشاک پاکدەکەنەوە.